الخبراء اللي عنّا، ربي يطوّل في عمارهم ويعطيهم طولة لعْمُر والصحة والعافية على الدور الجبّار اللي يقوموا بيه في التلفاز وفي الروادن على المسائل الاقتصادية واللي يفسروا للناس اللي ديما وسائل الاعلام يعتبروهم ما يفهموا شيء ولازم نبسطولهم هالمسائل المعقدة - وما فهمتش علاش: "لازم" نفسرولهم اللي كيف يطيح الدينار ما يساهم في تحسين الميزان التجاري الاّ وقتلّي فمّه شروط متاع "مارشال ليرنر" (مثلا)، واللي "الزيادة في نسبة الفائدة ما عندها تاثير على التضخم، الا بشروط متعلقة بالسياسة المالية العامة، وبنظام الصرف، وبالسياسات النقدية في العالم وبالوضع متاع النمو في البلدان الشريكة، هذا اذا كان فمة صفر قطاع غير مهيكل وما فمّاش ضغط على سوق الشغل (علاقة بيفريدج) وما فمّاش سلوك "احتكاري تعاوني" بين البنوك، واللي "طلب القروض عندو مرونة كافية بالنسبة الى الفائدة"،….
واللي هوما الناس هاذوما اللي هوما ديما "مساكن وما يفهمو حتى شيء" ديما يسخفوا، يفسرولهم الخبراء باللي التضخّم مسالة عالمية (معناها خاطيتنا، كينّا احنا بركة موجودين في كوكب الارض، في حين انو تونس فيها تضخم اعلى من متوسط العالم ومتوسط المنطقة الكل)، واللي البنك المركزي ما ينجّمش يعمل اكثر ماللي قاعد يعمل فيه، (وما يفلّتش الفرصة بش يخرج مالموضوع ويثني على المحافظ)، واللّي المالية العمومية ادّهورت على خاطر التوظيف متاع العفو التشريعي العام هاكًالعام، واللي السبب متاع عجز المؤسسات العمومية هو الدعم واللي لازم انّحيوْا منطومة الدعم واللّمو البنوك العمومية الكل في بنك واحد واللاّ نخصخصوها… واللي أحنا اللي مشينا لصندوق النقد الدولي موش هو جانا، واللي الاصلاحات لازمة باش ناخذو القرض التاريخي متاع الصندوق…
باهي،
هاوْ فمّة دول اخرين متخلّفة وحالتها اتعس من تونس، وتوصّلوا باش ياخذوا قروض من الصندوق، ودول اخرى تتعدى بتضخم اكثر من 20٪ كيما تركيا اللي البارح خذات وديعة بخمسالاف مليار من عند الصندوق السيادي السعودي بالرغم انها تبيع في الكاكاوية والكاجو للسعودية…
يا خبراء، الاقتصاد في الواقع ماهوش تخمينات. هو نظريات، وموازين قوى، ودبلوماسية وقوة ناعمة وسياسة وفي نفس الوقت كفاءة وجدارة.
مثلا، في مجلس الادارة متاع الصندوق، الصوت متاع امريكا هو حوالي 16.5٪ وصوت لتّحاد اللوروبي، اللي هو زادا تقريب 15%، يعني مع بعضهم يولّي عندهم حقّ الفيتو} واذا كان فمّه خلاف حول بلاد معينة ويتعدّاوا للتصويت، لازم البلاد المعنية بنوع معيّن من أنواع القروض تتحصّل على 85٪ من الاصوات!
برّه انت توّه احكي على نسبة الاجور في القطاع العام وخصخصة المنشآت العمومية اللي هو بحر متاع تعقيدات. اي، ونسيت بش نقول اللي فمّه هيئة موازية لمجلس الادارة اسمها (Strategy, Policy and Review) واللي هي الذراع السياسي متاع الصندوق. اذا كان يتغشّش يولّي ما فيه ما يتفصل.
انا نحب نعرف حاجة، اللي الخبراء هاذوما ربي يبارك فيهم يقولوا في الكلام اللي يقولوا فيه مُقنتعين بيه واللاّ لا؟ اذا كان مقتنعين بيه، لازم يشدوا ديارهم والاّ يعاودوا يقراوا طرف اقتصاد، واذا كان موش مقتنعين بيه، هذيكا حكاية اخرى.
باهي،
علاش التوانسة اللي خدموا في مواقع عليا في البنك الدولي عمُرهم ما عاونوا بلادهم كيما يعملوا الاردنيين والمصاروا ؟