توه سي عبيد البريكي اش ناقصو باش يكون رئيس حكومة، فاش خير منو مثلا أحمد الحشاني انتريتي البانكة ، على الأقل سي عبيد ممتلئ بروح بوليفار الثورية وضد الإمبريالية و عندو تجربة لافتة في العبور من هاكا العام وقت اللي سمّى الحزب متاعو "تونس الى الأمام".. والرخ لا..
وزيد بالنسبة ليه مراكز النفوذ و الثراء واحد وينجم يدڨدڨها على بعضها وريق حقوق وحريات ما يمنش به، هو على مذهب مانديلا في "التسامح والسلام" ومذهب غاندي في "اللاعنف" يعني ثوري م البلايص لكل.. كي تخزرلو تشوف في عينيه الثورة!
ثم راهو سي عبيد عمل مرة بيان على نظرية "الصراع والوحدة" متاع "لويس كوزر" لتوه أنا داهشة فيه البيان هذاكا متاع الصراع الاجتماعي الايجابي.. بيان متاع دماغ من الدماغات لكبار بلحق..
لوقتاش الحڨرة وعدم الانتباه للكفاءات الكبيرة اللي بلاصتها الطبيعية في قيادة "فاڨونات" حرب التحرير ،تي أصلا مرة هو قالها، قال" الرئيس يقول في كلام والفاڨونات يتحركو بكلام".. واحنا نحبو الفاڨونات في بلايصهم .