كي نقعد وحدي و نخمم اكثر حاجة مخي يحبس فيها ومعادش يستوعب هو كيفاش ثمه ناس تنجم تعيش وتواصل حياتها بشكل عادي وفوق اكتافها جبال من الأذى للاخر.. كيفاش تنجم تخزر لروحها في المراية و هي عامله الشرّ هذاكا لكل..
كيفاش تنجم تتنفس من غير ما تتخنق وهي خلات ديار ودمرت حيوات بشر ودمرتلهم مستقبلهم وشتت عايلات .. كيفاش تنجم ترقد وتاكل وتتكاثر وناس في الحبس بسببها.. وناس مرضت بسببها.. ناس تقطع رزقهم بسببهم..
تعرف اش معناها ادمرّ انسان.. تعيشو تجربة كيف تجربة الحبس مثلا .. وكان يبدا جبل تهدو.. ناس عاشو التجربة وخرجو بضرر نفسي ما يداواش.. مستحيل يبرا .. تعرف اش معناها تشتت عايلات وتفرّق صغار على أم والا بو وتحرمو حتى ياقف باش ياخذ عزاء إنسان يعزّ عليه و تضيع مستقبل عباد وتشرّدهم في بلاد ربي ..
تعرف اش معناها تبكّي بشر من الظلم.. بكّو الناس كيف ما تحبو.. مرروا حياة لعباد كيف ما تحبو.. يوم الظلم على المظلوم سيمضي حتى لو ترك جرحا ولكن يوم الظلم على الظالم ليل دائم.. نار تحرقك لآخر نفس في صدرك.. لعنة تلاحق نسلك على ولد الولد !!
وعلى الباغي تدور الدوائر.. انتظر فقط يومك.. فالحياة لن تتركك دون عقاب في الدنيا قبل الآخرة!