تو واحد كيبعول وذونو مرّة و تعجبو الحكاية و يولّي يبعول فيها ديما مرّة بباتونّي، مرّة بصبعو، مرّة بستيلو و تولّيلو سناسة و يولّي يلوّج شكون يبعولهالو، شنوه يتسمّى مرض و إلّا مش مرض؟
تنجمّ وذنو تحك فيه فيها شمبينيون، و تنجم يكون دخل في الحركة اللّارادية القاهرة، يعني يمشي لطبيب وذنين و إلّا پسي و يلقف روحو و ينجّم يرجع نورمال، بشرط أنّه يعترف و يقتنع أنّو مرض و يعاون شكون بش يداويه.
المشكلة الكبيرة أنّو ينكر مرضه و يعتبرو عادي مش هكه برك يولّي يعمل بالعاني و يحاول ينشرو، يعمل جمعية المبعولين بتاع الوذن و يربط مع جمعيات الدفاع عن الأقلّيات و الحيوانات الأليفة و يحلّ حوينتة و يدور الدّولاب.
وقتها رد بالك تقول عليه مرض على خاطر تولّي ضدّ السّامية و الحقوق الإنسانية الكونية اكالحقوق الّي ما شافتش شنوه صار في غزّة على خاطرها حولة و بعض ساعات يجيها عمى ألوان.
شنوه يتسمّى هذا ؟ تطبيع مع المرض.
كيتشمّت واحد في مرض و إلّا في موت و إلّا في حبس مظلوم و الّا في تعذيبو شنوه يتسمّى هذا مرض و إلّا مش مرض.
كواحد فاشل يحسد كلّ من ينجح و يعتبر أنّ فشلو نتيجة لنجاحو و يعتبر أنّو العالم الكل يتآمر عليه، شنوه يتسمّى مرض و إلّا مش مرض؟
كواحد عايش في الفقر للعنكوش يغزر لكل غني أو احسن منو ماديا عدوه و يحبّو يولّي في الفقر كيفو شنوه يتسمّى مرض و إلّا مش مرض؟
كواحد ما نجحش في قرايتو و بسّيف يفك الحرف يرى في الّي نجحو ما يجيو شيء و شهايدهم مضروبة و الدنيا ماهيش قراية و علم و نجاح شنوه يتسمّى هذا مرض و إلّا مش مرض؟
كواحد ممرمد عايش في الكاكا للعنكوش، يقص عليه الماء و الضّو و مش لاقي بش يخلّص فاتوراتو و كراه و دواه و تقلّو عاجبك الوضع ؟ يقلك لا أما المهمّ هذوكم لا، شنوه يتسمّى هذا؟
كواحد يسبّك حاشاك و يشتمك و قريب يولّيو زومبي يحب يخرج مالتليفون بش ياكلك على خاطر انتقدت الوضع الزفت المنيزك الّي عاشين فيه الناس الكل بمافيه هو شنو يتسمّى هذا؟
كيولّي انتقاد الحاكم كما سبّان ربّي أو أكثر، شنوه يتسمّى هذا؟
كيكثر الإدمان بانواعو، و تظهر الجرائم الغريبة بانواعها و يولّي الانتحار خبر عادي، شنوه يتسمّى هذا مجتمع مريض و إلّا لا؟
حاجتين يا بش نعتبرو الحالات المرضيّة بالحق مرضيّة يا بش نطبّعو مع المرض.
راهو التطبيع أنواع مش كان التّطبيع مع الكيان السرطاني الّي ما يتسمّاش و هو أم التّطبيع و خاتمته.
التّطبيع هو إعادة تشكيل الوعي الجمعي حتّى يقبل ما لم يكن مقبولا أو مالا يقبل بالفطرة السّليمة أصلاً, شكون يقبل بالأُبنة،بالسرقة،بالقمار،بالفشل،بالجهل،بالفقر،بالرّذيلة،بالوصولية و الانتهازية و التلحيس و القوادة و الظلم و انتهاك العرض و الشماتة في الموت و المرض؟
طبيعيا في بيئة طبيعية سليمة و لا واحد يقبل، كتتقبل بعضها أو كلّها يعني الأفراد مرضى و المجتمع مريض.
شنوه نعملو قدام المرض مثلا كماالسرطان الخبيث كما هاك الكيان؟
نعتبروه مرض خبيث بعد التشخيص و نبداو نعملو خارطة طريق بتاع علاج عاجل و آجل، على خاطر حاجتين مع السّرطان عافانا و عافاكم اللّه ياما يقتلنا ياما نقتلوه، ياهو يا احنا.
سامحوني على التطويل الّي بدأت من تبعويل الوذن.