كلما تتزنق المنظومة الي تحكم تسيبنا عظيم نتلهاو بيه…

تو بربٌي خوذوني على قد عقلي و فهموني،تو واحد وصيف طمبلة كما تقولو يمشي زبنطوط في الشارع و النّاس تصوّر و تتفرّج ..يعني ما كانوش ينجمو يستروه و إلا ينهروه ..زعمة معادش فمّا رجال؟ و سي الحاكم وينو و إلا لاهي كان بالمدونين و المعارضين...نصف ساعة و إلا اكثر و الشاب يستعرض في عضلاتو و في مقدمتو و في مؤخرتو..و لا واحد يدّخّل..زعمة سي الشباب في اتم مداركو العقلية و إلا عامل كعبات و إلا مكستازي و في دنيا أخرى...زعمة وحدو ظهرلو بش يستفز الجميع في عقر دارنا و إلا مأجور و دافعينو بش يعمل فلم الفتيشزم و الستربتيز بتاعو ..يعني هو مش انسان كيفنا و متوحش..جاي من الغابة و الهمجية بش يفحج علينا احنا المتحضرين ..الشاب هذا خلاووه يحوّس قرابة النصف ساعة و صوروه و الڤيديو يدور في الفايسبوك..شوفو يا عباد شنوه ينتظر فينا..باهي كيف صوروه ملتالي و خافو شوية على شعورنا..

كيف كيف هاك المرا الوصيفة الكحلوشة القزمة كما البيريني..عريانة زقط و تحوس في الشارع...كيف كيف صوروها و عداو الڤيديو و الناس تبارتاجي و تطلب في اللطف...زعمة كانت في اتم مداركها العقلية و إلا محربشة أو عاملة دوزة زايدة...و إلا الملونيين هاذم حيوانات و هوايش و متوحشين ..ما شفتوش كيفاش يهددو فينا عيني عينك و طالبين الشبوك..و جايين بش يفكونا ارضنا و يطردونا و إلا يقتلونا...و عندهم مخطط و مؤامرة و هوما يكشفونا في مؤامرتهم عبر الڤيديهات الي يهبطو فيها و الي ننشرو فيها...هاو تهديد مباشر..هاو براكاج..هاو قتل .هاو اغتصاب..تو واحد عندو مخطط و مؤامرة يكشف روحو و إلا يخليها بستر ربي حتى يحقق اهدافو؟

باهي يا سيدي ماشي معاك...خليها مؤامرة و احنا الكل لاهين يتآمرو علينا انس و جن و مخلوقات فضائية..منين دخلو الجميعة ..زعمة من البحر و إلا من البر و إلا من الجو و إلا من نقبة المطار أو من نقبة منزل السفير..ومكثر نقبنا؟

تو ماكانوش افارقة يا حليلتهم يستغلو فيهم كيد عاملة رخيصة..يخدمو فيهم في الخدم الي ماعادش يحب التونسي يخدمها و وولّى يخمم كان في الحرقة ...مش هاذم الي كانو يشطحو في شارع الحرّية و قت جابوهم و وزعو عليهم لافتات و حفظوهم بش يعيطو بحياة الزعيم..يهيا كيس سعيل..تذكروها..زعيمنا راهو أممي و كما معمر ملك ملوك افريقيا…

و مش زعيمنا ربي يطولو في عمرو و يعطيه على قد قلبو..عمل اتفاقية مع ايطاليا و الاتحاد الاوربي بش نخدمو كلاب حراسة و نمنعوهم من افواج المهاجرين الغير شرعين و نضربو في الفلوس مقابل خدمتنا هذه ..تو علاش سيدي خويا لازم نقولو هونا بير و كلام القائد صحيح في صحيح و فمّ شكون لاهي يقبض مقابل تسهيل دخول هؤلاء و تستاهل دولتنا كل خير...يعني المشكل مش جديد و لاهي يطيب عندو مدة...و مالا شبيه تو ظهر و زاد كبر..ما عاد كانك خياط تبع الغرزة و شوف شكون لاهي يستثمر و يستفيد مالحكاية …

كما بالضبط اغتيال شكري بلعيد و البراهمي..و كما أغلب العمليات الارهابية الّي وقعت..و كما سلسلة الحرائق...و الهجوم على الزوايا...كما قضايا المساواة في الميراث و المثلية...كما القضايا الهووية...كلما تتزنق المنظومة الي تحكم تسيبنا عظيم نتلهاو بيه...ديما فمّا أرضية و قابلية للمشكل الي يحددوه و يوجهو بيه اهتماماتنا بالضبط كما يساق القطيع…

راهم مهفات و يخدمو في خدمة صحيحة بتاع مختبرات...استفزاز الغريزة و استثمار في الرد الفعل الباڤلوڨي..و احنا تبارك اللّه علينا عنّا استجابة آنية سريعة و قوية كما مشكل سرعة القذف عند البعض... و ما فمّاش اقوى من استفزاز غريزة البقاء...وقتها بصراحة واحد ينجم يضحي بحريتو و كرامتو و يبلّع جلغتو مقابل أن يبقى و مقابل الأمن و الحماية الي بش يوفرهالنا بونا الحنين و حاكمنا الي يعرف مصلحتنا و وحدو قادر بش ينجينا و يمنعنا من الأخطار و الغولّة...أما خير هكه و إلا نموتو و إلا تصير فوضى؟

تو تحب تقول يا سي الفاهم أنو ما فمّاش مشكلة بتاع افارقة في تونس...لا يا سيدي فمّ أما فمّ شكون لاهي يضخّم فيها و يهوّل فيها و يستثمر فيها..تو صعبت عليهم يراقبو المداخل و المخارج بتاع البلاد و يراقبو نقبنا..تو ما ينجموش يعدّو قدّاش فمّ من واحد و الّا نسينا الحساب؟ و الّي مخالف القانون ما ينجموش يوقفوه و يدكوه في الحبس و إلا الحبس كان للّي يعبّر على رايو و يعارض سيدنا و المجهودات الّي تهدر فيها الدولة بش تبّع و تحاصر في معارضيها مش كان أولى ان توجّها للمشكلة الراهنة ..ايه عاد كتعمل هكاكه باش بش يلهيو العباد و كيفاش بش يدربوهم بش يخرجو مخزون الحقد و الكراهية و الاستعلاء و العنصريّة...ما هذاك زاده تاهيل سلوكي و مران على حالة الحيوانية و التوحّش الي يحبونا نوصلولها بش نهارآخر بقدرة ربي نجمو ناكلو لحم بعضنا من غير ما نعوفوه و من غير ما نغصّو بالضبط كما الهوتو و التوتسي بتاع رواندا الي فاتتنا حاليا باشواط في التنمية.

وينها انسانيتنا...وينها سماحتنا...وينها طيبتنا...وينها تقاليدنا الاصيلة..وينو ديننا الي يقلنا أن اكرمكم عند اللّه اتقاكم و لا فرق بين اعجمي و عربي إلا بالتقوى....وينو عقلنا...و الغريبة أنو فما شكون يخونك وقت الي تحكي هكه..عن العنصريّة و الكراهية و هي في الحقيقة منتوجات طبيعية لكل شعبوية و فاشية و شوفينية و استبداد..و كيف تحب تقاوم الفاشية و الشعبوية بالضرورة يلزمك تقاوم العنصريّة و النازية و الصهيونية. هي كل لا يتجزّأ و المسألة مبدئية.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات