هوشي منه هو أي كذاب تذكر الآن التدخل الخارجي
خويا هوشي منه اني عارف غُشّك خايب وانت ماترحمش خاصة في التدخل الخارجي،وخاصة خاصة مع الماريكان. شخصيا اني معاك رغم اني ماعنديش جواجي باش نكسر الماريكان كيف الجنرال جياب. اما موش على حاجة حبيت نذكرك خويا هوشي الامريكان هاضم كيف يرتحونا من الخوانجية ماهوش تدخل خارجي؟ على خاطر خويا الهِش في كل انتخابات امريكية انت الوطني السيادي الكذاب تقولنا " هاهو جاهم فلان الخوانجية تو يرتحنا منهم": بعد الولاية الاولى لاوباما سمعنا الكلام هذا، وخاصة عندما جاء طرامب الولاية الاولى وخلال انتصار جو بايدن ومع تنصيب ترامب الولاية الثانية.
خويا الهش ديما تذكر حاجتين: تذكر اش كنت تقول سابقا، وتذكر ان الناس تتذكر: نقابيين واعلاميين وسفيان بن فرحات وسمير بالطيب والمغزاوي والمهوك والجنرار وفاطمة متاع الانوار ومحسن والاوطاد ومباركة.. الكل كانوا يقولوا " هاهو جاهم ترامب وانتهى عصر الاسلام السياسي.."
ثم جماعة خاصة الي جلّحوا طويلا في جرّت سيدنا واخذوا الثالث من مارس يقولون الآن" نختلفوا مع السلطة أما نرفض التدخل الخارجي" وعلاش ماله قبل ماقلناش " نختلفوا مع الخوانجية أما نرفض إزاحتهم من طرف الغرب"؟
خويا الوطني السفيه: الطغاة يجلبون الغزاة. نعرف الأمريكان هم ابعد خلق الله عن مساندة الديمقراطية ولكن استبداد فج واعمى يسجن الناس بطريقة بدائية يعطي تِعِلات لأية قوة بالتدخل. عندما تناصر انقلاب وتدمير مؤسسات وتمزيق دستور وكتابة اخر تحت حيط وتُبرر سجن الناس بدون أدلة انت تجعل من تونس ملف في أيدي الخارج بالضرورة: انظر جيدا الي عدد المرشحين الرئاسيين المسجونين : ماذا نقول لابناءهم؟ اتركوا اباءكم في السجون وناصروا سيدنا ضد الامريكان؟
راهو مانجموا نحسوا بالوطنية وندافعوا عليها إلا في نظام يحس فيه الإنسان بكرامته ويكون محل رضا وإجماع الناس موش نظام شارك فيه 2% من مجموع الناخبين!
عارف خويا الهش الي مخك مقوّد تو تڤول هذا يبرر في التدخّل: اني نعطي فيك في قابليّة الاستعمار، قابلية التدخل. بلغة كانط( عارفك تفهم كان بالفُقهي) شروط امكان الشي/ الحدث
كلمة أخيرة لخويا الهِش: كيف انت عيرود وسُجاع وماترحمش في السيادة عاد ماله سيدي خويا اعملنا هاك القانون الي بقيت سنوات تبكي عليه تجريم التطبيع؟ أما اسهل قانون تجريم التطبيع والا قانون استرجاع الديمقراطية في أمريكا؟ خلي عاد من تكسير أمريكا كيما صارلها في فياتنام.
كلمة اخيرة اخيييرة للمبخوص الي يدعي في سيدنا الي تقوية الجبهة الداخلية: كان تقوله شكون الجبهة هاذي؟ يڤول الشُّعُبْ والوطد والاتحاد. والآخرين لا. إيه ويقوّيها بمعنى؟ يشرّكها في الحكم.
وامر الله يقضيه الله