سيناريو لو أن احمد السعيداني نهضاوي

-الو الأخ الأمين العام، سمعت أش قال هاك الإخواني الظلامي؟

- تي هاك الخوانجي احمد السعيداني ، ماهم مايشوفوا المرا كان بوصفها جنس وحريم، ياخي قال لوحدة من حراير تونس وبنات بورقيبة الحداثيات كان ندبرولك راجل تو تعقلي..

- اوه اوه ! ياولدي زايد يشوفوا في المرا كان جسد، وناقصة عقل، ومخها موجود في بلاصة أخرى موش في راسها. زايد خطاب مزدوج ويستعملوا الديمقراطية من اجل الانقلاب عليها، غير يوصلوا التمكين بركة وبنات تونس يحولولهم الي سبايا..هاذي مايتسكتش عليها، هاو باش نكلم جماعتنا من العايلة التقدمية الحداثية، تي حلفاءنا هاك الي نعطي فيهم من فلوس الشغالين 100 و200 مليون في مؤتمراتهم، كيما اتحاد المرأة والنساء الديمقراطيات ونقابة الصحافيين وطراشنو مدنية الدولة .. ونصدروا بيان مشترك.

- سي نورالدين وبعد نعملوا اعتصام قدام مجلس النواب متاع الخوانجية.

- إي هانا مع الاوخيان في المكتب التنفيذي باش ندعوا لاعتصام ونفرضوا حوار وطني باش ننقذوا تونس من خطر الإرهاب..

-بربي كلم مدير التلفزة باش يعدي الخبر في الاول الثمنية وبعدها يستدعي سلوى الشرفي وامال الڤرامي وفتحية السعيدي ومنجي الرحوي ومايسالش يجيب معاهم وحدة من النهضة تكون موش متكلمانية باش يرحوها..

- باهي باهي خلينا تو مع المكتب التنفيذي قاعدين نختاروا في رئيس الحكومة شكون.. يلزم الجماعة الي ربحوا في الانتخابات نخرجوهم نهائيا من الحكومة..

- سيد الأمين العام بربي زادة كلم الحوار التونسي يجيبو رافع طبيب وبدرة قعلول يوضحوا للناس إن الجملة الي قالها هي كلمة السر بينهم وبين عبد الحكيم بلحاج وأبو عياض باش يهجموا على قاعدة الوطية يهزوا منها السلاح ويتوجهوا لراس الجدير.

- باهي باهي تو بعد واحد من المناضلين النقابيين يتولها بالتفصيلات هاذي ويكلم الاعلام يعملوا حملة كيما الي عملناها وقت هاك الطرطور قال " سافلات".

- سي نورالدين قال " سافرات".

- تي ماهو كيف كيف .. أيا نخليك سي محسن .

-عاش الاتحاد عاشت تونس عاش المكتب التنفيذي.