عملية تزييف الوعي وتوجيه العقل التونسي الى قضية الخلاف السياسي الهامشية للتغطية على الاهتمام السياسي الاصلي اي ما يسمى في لغة الحرب بالعملية التمويهية للتغطية على العملية الرئيسية ... هذه المهمة كان ينجزها الاعلام في العشرية الماضية لمحاصرة الانتقال الديمقراطي وايقاع الطبقة السياسية المناصرة للتغيير في الفخ وصناعة مزاج الغضب والاحتجاج شعبيا على الديمقراطية ....
وقد نجح الاعلام في الاجهاز فعلا على المسار ليكون البلد يوم 25 جويلية في حالة تقبل كلي لقتل مسار عسير كان سيبدأ في الوعي بأخطائه وخطاياه ( حتمية تاريخية ) وبالتالي كان سيبدأ في معالجة امراض الديمقراطية بالديمقراطية( التراكم الكمي للازمة والاخطاء للانتقال النوعي نحو ترشيد المسار) ولذلك كان لابد من المسارعة بايقاف المسار حتى لا يجد وقتا ليبدأ في اصلاح نفسه ....
اليوم يعيش هذا الاعلام ارتباكا يعالجه مرة اخرى بالتي كانت هي الداء : هو يدرك مأزق 25 جويلية وأنه كاعلام ومن وراءه من لوبيات سيكون ايضا في طريق جرافة 25....ولهذا تراه يفتح الباب لنقد 25 واحيانا بسقوف اعلى حتى من المعارضة الراديكالية للانقلاب ....لكنه يعيد دوما الى الصدارة المعركة الرئيسية مع النهضة وجبهة الخلاص وشارع المعارضة الجذرية ل25 جويلية ....لاحظوا هذا الازدواج : يبدا البلاتو ينقد في 25 وبشوية بشوية يتعدى للعشرية والنهضة وجبهة الخلاص لدرجة ان نقد 25 ينتهي ..
شنية الحكاية ؟ ...تلك لعبة محرك الدمى الكبير ...المهندس ...يصنع حكمه ويصنع معارضته البديلة ( احنا ديجا سميناها الوظيفية من وقت رقصها في البرلمان الشرعي ) ...ويقيم الحواجز الضرورية امام الشارع السياسي الي مش تابعو باش عند قرار التغيير ما يكونش هذا الي مش تابعو طرف في الترتيب …
باهي لواه نبربش ونقول علنا الشيء هذا ؟ علاش ما نخليهش بيناتنا ؟ هانا فاهمين وساكتين وخلي 25 والوظيفية يتعاركو واحنا تكتيكيا ما نبينوش اننا فاهمين باش ما نتعاركوش مع الوظيفية مرحليا خصوصا انهم اصبحوا توة يعارضو 25 ؟
لا ...ما نعملش هكا لاسباب عديدة :
اولا يلزم الناس تفهم والبناء المستقر للديمقراطية مستقبلا مش ممكن يكون قوي من غير ما تقول للوظيفي راك وظيفي وبطل تكون وظيفي باش نصدق انك ديمقراطي .
ثانيا مقولة وحدة المعارضة هكاك حمص وزبيب ماهيش فكرتي او رغبتي بعد امتحان 25 والفرز الي عملو واصلا ثمة قوى ساندت 25 بصدق تنجم تكون اقربلنا من الوظيفيين الي تحرك فيهم خيوط ملاعب الدمى.
ثالثا باش برشة من اصحابنا من مكونات الجبهة مستقلين واحزابا الي مدمنين على الاعلام التقليدي متاع هايكة السنوسي يبطلو ادمانهم ويتعلمو يشدو ديارهم باش ما يكونوش وليمة لاعشاب البحر ... يعني كي تمشي تكسر الفخ والا مش لازم …