عشرين الف نقد كتبنا فيه ...خطورة صراع حافظ / شاهد و باقي الشقوق هو صراع منظومة تصدعت؟ كتبنا فيه معلقات ...الشاهد و محيطه و انتقائية معاركه و توظيف الدولة و كيفية تأسيس تحيا تونس و رسكلة شخصيات كانت شريكة في استقطابات 2012 و 2013 و نتائج 2014 الكارثية على الثورة و الانتقال ؟ نبحنا و ننبح يوميا في التذكير بذلك …
اعتبار الشاهد و الزبيدي و مهدي من جهة و نبيل و عبير و الخ ترشحات خصوم بالنسبة الينا رغم انهم خصوم لبعضهم ضمن تناقض منظومة 4 201؟ خيط ناظم في تحليلنا و ايماننا بالانتقال الديمقراطي و تجاوز مقولة ثورة / ثورة مضادة لا يمنعني من الاستمرار في اعتماد هذا الفرز .....اوكي .. انا نقلك هذا مش انت تذكرني به …
لكن ...لااااكن ...لاااكن ...ما تقنعنيش ...ما تنجمش تقنعني انو التنرفيز برشة و التنديد برشة بما وقع لنبيل القروي هو الامتداد الطبيعي للأفكار المذكورة اعلاه ...لا ... ماهاه ..نرفض ...مشكلتك تحب تعارض تحالف نهضة / شاهد ؟ ...ايه ...علاش لا ...حتى انا ننجم نكون معاك في معارضتهم ...تعارض في توظيف الدولة " لتدمير الديمقراطية " يا عيني ؟ ...ايه حتى نايا كيفك و ثمة اربعماية مليون تبرير و دليل لمعارضة هذا التوظيف ...اما انو نولي مفكسي كيفك انو التهديد هذا متاع توظيف الدولة يكبر و يصبح يهدد بالويل و الثبور كي يتحط نبيل في الحبس ...نقلك لا ...نون ...ناو ...نيات ...
الامور معقدة ؟ ايه طبعا اما خلي عقلك مركب مش تبسيطي باش تفهم المعقد و تختار معاركك ...اكتب بشكل معقد امالا و دقق و فصل في المعارك ...هاني انا نفصل .. تبع التفاصيل ...قول هنا نعم انا هنا مع القضاء و الدولة في القضية هذي حتى كان يظهرو انهم معو الشاهد و بربي يا دولة و يا قضاء وضحولنا باش ما تظهروش في الفازة هذي الي هي باهية كأنكم مع الشاهد ...قول المعركة كذا نصطف فيها و الاخرى لا …
التبسيط لا عيش خويا ..نبسطو الحكاية : القضاء شد فاسد ...ثمة فساد اخرين ما تشدوش ؟ اوكي ..معاك قل له يشدهم ...تشك انو ثمة توظيف ؟ اوكي اطلب توضيح و احرج القضاء و ندد بالتوظيف اذا ثبت …
اما تهبط طول على خاطرك كونتر الشاهد و زمارة و تحب الناس الكل تمشي في تبسيطاتك ؟ ...انت ضد الشاهد و النهضة تولي تندب مع نبيل و تحبنا نندبو معاك و الا نولو مع الشاهد و النهضة ؟ .لا عاد ...يا تندب وحدك و تقيلنا ...و إلا عبر بدقة و تعقيد على الوضع الدقيق و المعقد ...ما تنجمش تعبر ؟ و لهذا تعتبر كل الي ما يندبش مع نبيل يعني مع الشاهد هاذيكا مشكلتك ...التبسيط لا ...البلادة لا قال كمال التواتي ربي يشدو بالصحة ..البلادة لا …
انتقال معقد نعم ...و فيه خلط اوراق و انت يا حبيبي رتبها بعقل يفكك الخلط و الخطير و الاخطر و الرئيسي و الثانوي ...امالا ساهل هو ؟ ....سلام.