وقت بورقيبة... كنت طفل صغير صبولو في طاست مخو بالقمع...بالراديو إلي كان يشرقع من الصباح لليل...والتلفزة إلي خلطت علبه... عاد تربيت من غير ما ندري وقتها...على إعلام حكومي خشبي...لا يوريكم...هههه… والإعلام هذا...فيه برشة برشة ترتيب... هههه … تقولش عليك في ثكنة إعلامية...في الراديو. ... والتلفزة...هههه …
كل شيى كان منظم...ومعلوم مسبقا...كي الديسكو المكسر...تقولش عليها سرابس يومية.. هههه … وما كانش ثمة لعب في الأمور هاذي...كيف أمن الدولة...وبورقيبة كان الدولة...والدولة كانت بورقيبة..هههه … عاد كل يوم في بداية الإرسال...وبعد القرآن... يحطولك المدائح والأذكار..هههه …
وهي مدائح لبورقيبة مؤسس دولة كانت قبلو غبار من أفراد... خلقها كيف في فازة البيق بانق...ولا فازة كن فيكون مع بورقيبة تكون... وشخصيا فازة ثلاثة آلاف سنة حضارة ما سمعت بيها كان كي كبرت بفضل قراءاتي الشخصية...هههه …
وكانت أذكار على بطولات المجاهد الأكبر... والمجاهد الوحيد...وطبعا ما ثماش قيادات وطنية أخرى ناضلت ضد الإستعمار ولا حتى شهداء ...ولا يذكر بعضها إلا أحيانا..في المناسبات الوطنية..وقت ما يلقاو بيها وين.. إلخ.. وحتى تاريخ تونس والحركة الوطنية نظفوه الصياح..ومؤرخ القصر الكعاك..من كل ماهو موش بورقيبة...للي مرة الكعاك نظرلنا على فردة صباط قديمة لقاووها يندرا وين..ونسبها لبورقيبة في إحدى بطولاته...هههه …
وبعد يحطولك برنامج القافلة تسير...لتثمين الإنجازات إلي عملها بورقيبة وحدو..وموش بفضل تضحيات الشعب التونسي...وعرق جبينو... وفي نصف النهار يحطولك الدكتور حكيم...إلي يقلك وقت تنقص مادة من السوق بسبب السياسة الإقتصادية غير المستقرة لبورقيبة...(كان في الموضوع هذا يجرب في الحجامة قي ريوس اليتامى وكل فترة كيفاش... ومن النقيض للنقيص)...
عاد كان يقلك الدكتور حكيم البضاعة الناقصة في السوق...راهي موش باهية للصحة...ووقت ترجع نفس المادة للسوق لسبب او لآخر...يقلك راو العلم الحديث بين أنها طلعت باهية للصحة...هههه … وبعد عاد تجيك نشرات الأخبار...لصقل عقول الرعية…
الأمور كانت ياسر مرتبة...للي الواحد كان يعرف شنوا الخبر إلي باش يجي بعد...هو ثمة لعب مع بطولات سيدنا؟ قضية دولة هاذي...هههه…
كانت تبدى باستقبالات الرئيس...حسب مرتبة المستقبلين في جهاز الدولة...ملي لفوق وانتي هابط.. وبعد نتعداو للبرقيات إلي بعثها ولي جات للرئيس من رؤساء دول أخرى...بمناسبة الأعياد الوطنية والدينية... ونشاط الرئيس كان هو لول والساس في نشرات الأخبار...حتى وقت يكون في عطلة في قصر صقانس في المنستير...يوريوك كيفاش استقبل فرق بمناسبة 3 أوت تتغنى ببوطولاته التاريخية وانجازاته وتعملو في الفارينة... وكيفاش يعوم في البيسين...وكيفاش استقبل نساء حررهن...ويربت على خدودهن وهو شايخ فرحان....هههه...الخ..
تي ملخر...تقولش علينا عايشين معاه ساعة بساعة...صباحا مساء ويوم الأحد..هههه… وبعد نتعداو لنشاط الحكومة...وزادة بالترتيب حسب الرتبة في الحكومة..من الوزير الأول..للوزير..لكاتب الدولة.. وبعد نتعداو لنشاط حزب الدستور....واجتماعاته في الجهات للتنويه ببطولات وانجازات المجاهد الأكبر...وسياستو الحكيمة…
وزادة هذا بالترتيب...من مدير الحزب عضو الديوان السياسي...إلى بقية أعضاء الديوان السياسي..وأحيانا إلى اجتماعات الكتاب العامين للجان تلصيق صور انجازات المجاهد الأكبر على الحيوط...هذا كان ثمة شوية بندير باهي للزعيم... وتوفا بيهم الأخبار الوطنية..
وبعد شوية أخبار عربية وعالمية مدة دقائق قليلة...ويوفا الميضوع.... هاظاكا كان الترتيب...كل يوم...ماو قلنا سرابس...هههه ... للي الواحد كان في غياب وسائل إعلام أخرى...وللإطلاع على الأخبار العربية والعالمية...ما يركز على الأخبار إلا في نهايتها...هههه
وبعد عاد مع بن علي...بقى نفس الترتيب...هو يجي منو يبدلو؟ وزيد هو ربابة بورقيبة..هههه … لكن بن علي زاد حوايج في الإعلام الخشبي... ولمزيد تنظيم والتحكم في الأمور....عمل وكالة إتصال خارجي تتحكم في اشهار القطاع العمومي..وتوزعو للإعلام الخشبي...ولصحافة المجاري إلي عطاها رخصة بن علي لتشجيعها على التنكيل بالمعارضين والحقوقيين...والإشراف وتنظيم الإعلام الخشبي في الخارج...في عصر العولمة الجديد...ورشوة الإعلاميين العرب والأجانب إلي يعملو الفارينة لبن علي في بلدانهم...وخلاص مصاريف ومكافئة المتزلفين التوانسة مثل عبيريرة بن علي وغيرها... المدافعين على سياسة بن علي في مجال حقوق الإنسان في المحافل الخارجية...ضد التشهير بالإنتهاكات إلي يقومو بيها النشطاء الحقوقيين والمعارضين...وبرشة صحفيي بلاط رضعو منها وكالة الإتصال الخارجي...الخ…
لكن بعد الثورة...عفوا الانفجار الثوري هههه...تغيرت الأمور... لا عاد ثمة ترتيب ولا هم يحزنون...وتحلت وكالة الإتصال الخارجي...وتعملو المرسومين 115 و116...للقطع مع التنكيل بعقول المواطنين...هههه هههه… باهية هاذي فازة التنكيل؟ ههههه..مسروقة بالمقلوب وعلى القياس...من فوكابيلار هاظاكا..هههه هههه …
عاد بعد الثورة اتطورنا....وأصبحنا كيف الدول المتقدمة...وين الإعلام أصبح يحب يكون عمومي...وموش حكومي... وأصبحت نشاطات الرئيس... ما ثمة كان أصحاب المهنة المختصين في علم الإعلام يقدروها...موش في قرطاج.... إن كانت تدخل في واجب الإعلام بيها... او أنها حاجة تخصو...وأصبحنا انجمو نقعدو حتى شهر ما نسمعوش بيه فاش يدني الرئيس...ههه وقت تكون أمورو.. هههه …
وارتحنا من البرقيات .. وشكون استقبل... ووين يعوم..والفرق والشعراء إلي يغنيولو على بطولاتو ويعملولو في الفارينة...وهات من هاك التخلف والبلاوي...متاع شعراء البلاط القدم... إلي تخليك تهجر الإعلام التونسي...وتلوج علي يصير في بلادك في وسائل إعلام أجنبية...ههه…
فبحيث...حذاري... إذا كان باش نرجعو للترتيب...يلزم احترام الأصول..والعادة والعوايد...والمقاصد من الترتيب...هههه … عيب راهو كان ما نرجعو كان للترتيب... ما يجيش وحدو الترتيب...الصورة تبقى مشوهة... وهاذي موش أصول...هههه …
وبحيث....هذا يفترض أيضا برنامج جديد متاع مدائح وأذكار بانجازات الزمن الجميل الجديد...من بني قاعدي... إلى صلح جزائي... إلى شركات أهلية...والبرامج إلى تحكي حتى لوكان ما ثماش على توفر المواد الأساسية من خبز وسميد وسكر وقهوة وتاي وماء وضوء ورخص أسعار ...الخ..من أنحازات الزمن الجميل الجديد.. ويفترض أيضا برنامج قافلة تسير...تتأثث بالمفسرين للعهد السعيد....
وزادة برنامج لدكتور حكيم جديد...إلي مثلا يلزمو يقوللنا اليوم انو الفارينة تعمل الكوليسترول...والضلف مثلا فيه برشة منغعة وفيتامين...هههه … وطبعا كان ثمة حوايج أخرى جديدة ماركة علو شاهق..زيادة الخير ما فيه ندامة...هههه…