كثر الهم يضحك... والبهامة مصيبة البهيم... عاد انتي تقلو... المحامي راهو موش على راسو ريشة...لكن دورو في المجتمع باش يدافع عليك...لانكَ انتي زادة ما عندكش ريشة فوق راسك... قدام إلي عندهم برشة ريش.
ولذا يلزمو حماية وحصانة قانونية...تخليه المحامي ينجم يدافع عليك... وما يخافش على حريتو من أجلك...يا مهف.. ميكانش تراصيلو في ڨلبو على خاطرك....وطبعا وقتها يولي يخمم في حريتو قبل حريتك وحقوقك... ماهو إلا بشر كيفك...
ووقت يولي يخاف على روحو قبل ما يخاف عليك... تراصيلك وحدك مع جلاديك الي فوق ريوسهم برشة ريش... ويلقاو رواحهم في طريق مفتوح باش يجزروك.. ويعملو فيك إلي يظهرلهم..
وهو باقي يعنعن...المحامي ما يلزمش تكون فوق راسو ريشة. برا يعطيك برشة ريش على بهامتك. اكثر من البهامة هاذي عمري ما شفت.
بربي تصورو واحد ياكل في طريحة... وانتي تحب تعرض للعصا الي هابطة على راسو... وهو يقول للجلاد بربي زادة هو ما تنساهش.. راك تنجم زادة تخلطو عليا.
فبحيث... يا والله صطوكية في طاست مخك...يا مريش.