رأس الجدير... وقت الأنانية تتفطق على قلة حياء لا توصف…

Photo

بربي إلى ما يحشموش على رواحهم... وهبطو صورة الشاب إلى سب الرئيس... وسبوه وشتموه بعبارات أشنع من العبارات إلى سب بيها الرئيس... وثما حتى شكون تهمو بالإرهاب... وهي تسوطيكة من الوزن الثقيل... خاطرو كان جا إرهابي تو يعرض روحو للأضواء هكاكا... يا والله أحوال على البهامة…

هاذم موش فاهمين أنو الشاب هذا أشرف منهم... وتعرفوش علاش؟ على خاطر هو خاطر بروحو ومشى ليبيا رغم كل شيئ والميليشيات والحرب الأهلية وخطر الموت في كل لحظة... باش يخدم بعرق جبينو... و يبعث ماندة لعايلتو إلي الدولة مهملتها... باش تسترزق عايلتو منها.. وهوما ما يعملوهاش الأشاوس هاذم...ما عندهمش الشجاعة والأنفة متاعو...مسألة رجولية كيما يقولو...

وعلى خاطر السلطات الليبية قررت الحجر كيفنا... وما عادش ثما خدمة... ويلزمهم يروحو لبلادهم... لكن السلطات التونسية العظيمة... وعلى رأسهم الرئيس... خلاوهم ملوحين في الخلا على الحدود...وكأنهم موش توانسة…

وبقاو أيام طويلة عالقين في الشر والشمنتر بدون مساعدة من السلطات التونسية... إلى ما حسوهاش متاعهم من جراء سلوكها تجاههم... منعتهم من دخول بلادهم يا بوقلب.. وكأنهم كرايا موش ملاكا فيها كيف إلى يحكمو.. بدعوى تسكير الحدود...وهذا خرق فضيع للدستور...

ووقت هو التكسير على الأجانب وموش على عودة التونسيين العالقين في الخارج... والدليل أنها بعثت طائرات لبلدان أخرى لإرجاع التوانسة العالقين كيفهم في الخارج...

وزيد بقاو سيادتهم يتفرجو فيهم كيف الكلاب السايبة… بدون مساعدتهم… ولوكان موش الهلال الأحمر الليبي الي جابلهم الأكل والشرب.. راهم كلاهم الحافر أكثر… وهذا مخالف للدستور في حق مواطنينا في ليبيا…إلى يضمن المساواة بين التونسيين… ياخي الشاب هذا موش لزتو للحنق عليها وللخطأ… السلطة بالوضعية اللإنسانية الي فرصتها عليه…؟

لكن إلى تشمتو فيه وسبوه ومثلو بيه وبصورتو…وبعبارات وأوصاف أقذر برشة ملي اقترفها هو…وقت هوما شايخين في ديارهم وبين عايلاتهم.. وشهرياتهم ماشية ومززيين.. هاذم أشرف منو؟ … مستحيل…

هو راجل وغلط… والرجال تغلط… وهاذم شنوما زعمه؟

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات