برشة مساندين للإنقلاب على دستور 2014...واندعاو انو ضد النهضة... ياسر تضحكني هاذي.. وعاونوه باش ينجح.. لكنهم عاملين فيها اليوم متفاجئين من دستور البني القاعدي بعد نشره …
وهو قبل ما ينشرو.. عدّى عشرة سنين يفسر فيه. وهوما عاملين فيها موش فاهمين... ولاّ فاهمين وموش مصدقين. وزيد كانو عاملين فيها لينا ... كيف ما يتقال بالعكري.. وكان بويضاتهم البولية فوانيس.
فهنيئا لهم.. بما قففو له. وهوكا منقلبهم إلي بايعوه... يمشيو يتفاهو معاه توا.. ولا ترد فاس على هراوة .
أحنا خاطينا الملعوب المغشوش هذا... خارجين من اللعبة ورافضين كل المسار شكلا... منذ 25
جاية تحبو من تحت من يمرد
هيئة البوصاع ومسحان البلار... قتلك باش تعمل 900 مكتب اقتراع متنقل... اكثر من المكاتب الموجودة..
تعرفو شمعناه هذا؟ وشكون باش يراقبها؟
وزيد قتلك مكاتب الإقتراع باش تكون مفتوحة من السادسة صباحا للعاشرة ليلا... يعني 16 ساعة... يسبقهم الإعداد للتصويت.. وبعدهم الفرز... يعني حوالي 24 ساعة.. يا بوقلب...وعاد ما نحكيلكمش شنوا ممكن ينجم يصير من تكمبين وتدليس مع الإرهاق للملاحظين .
وزيد لتوا ما طالبت من المنقلب على الدستور.. بتحديد عتبة المشاركة الممثلة في على الأقل في نصف الناخبين المسجلين لتتمكن من الإدعاء بنجاح الإستفتاء المغشوش. فبحيث...ما يزيش حكاية الدستور المنزل مرفوضة شكلا... لكن من حيث الأصل حكاية الستفتاء مبنية على الغش .
وتو نحكيلكم مرة أخرى كيفاش كان يصير ملأ الصناديق (bourrage des urnes)... وقت بن علي...إلي كنا نحبو نعاينوه ويمنعونا... ونعملو في الميضوع تقارير... في رابطة حقوق الإنسان.
هيئة جاية تَحبو من تحت من يمرد.. كل هؤلاء الآلاف الي أصبحو عندهم تجربة في مراقبة الانتخابات منذ الثورة.
وبحيث.... حط العتبة...يا قيسون... لهيئتك المنصبة..
وبحيث... أنتم المشاركين في الإستفتاء...وباش تصوتو بلا... راكم باش تكونو شهود زور.... لوكان تشاركو وما تحطوش مراقب في كل مكتب اقتراع... وخصوصا المكاتب المتنقلة... وطبعا ما نيش نحكي مع إلي يعملو في الفارينة للمنقلب على الدستور... وقالو باش يصوتولو بنعم قبل حتى ما قراو دستور البني القاعدي.
هاظوكم طيور على أمثالها تقع....
وهاني باش نقولكم من توا... طبعا باش ينفيو كل تزوير... كيف ما كونو يندعيو قبل التجمعيين.