عاد ما زلت تقرأ لليوم يا بوڨلب... لنظروت ثقفوت... يندعيو التقدمية... وحتى الثورية... يحكيو وكأن النهضة مازالت تحكم اليومَ... وتقرر. وموش غريبة منهم لوكان يرقدو ويقومو ويقولولك دستور البني القاعدي هي زادة وراه.
وتجي تحاول تفهم اتدوخ....خاطر السياسة هي شنوا رايك في سياسة الحاكم إلي يحكم اليوم.... موش وقت بكري. خاطر هذكا مطروح للتقييم موش ما يتعاودش غدوة.. لكن إلي يحكم اليوم هو إلي يقرر في عيشتنا وحياتنا وحرياتنا اليوم وغدوة.... وهو إلي يلزم نساءلوه وناقفولو في الدورة وقت ما تعجبناش سياستو... ونقولها بالوضوح والصراحة...وبدون لف ودوران وشطحات لولبية وكأننا ازلام مكلفين بمهمة قذرة....من طرف الطرابلسية الجدد... بعد الجدد لخرين متاع قبل 25.
كون واضح وصريح يا رفيق ....وبطل التزلويص. راك عملت العار للتقدمية وللثورية... ودنست مبادءها وأخلاقها...ومسحت بيها القاع.
عاد ها الجماعة عندهم وسائل التواصل والإعلام السمعي البصري... وكل يوم يسمعو في المنقلب على الدستور يخطب وحدو باسم الدولة والشعب ...ويفسرلهم في سياستو بالمكشوف ... حتى بالميكروبات والتخوين والتطهير.
ويعرفو كيفاش يحكم وحدو منذ 25 بعد ما استحوذ على الحكومة وسكر المجلس.. وكيفاش يأخذ في القرارات وحدو... ويعمل في التسميات بالمئات في مفاصل الدولة من أنصاره من الصحابة المفسرين. وكيفاش ينفذ قراراتو بقوة البوليس إلي استولى علي الإشراف عليه خلافا للدستور …
وكيفاش سكر هيئة مكافحة الفساد...وحط رئيسها في الإقامة الجبرية خارج نطاق القانون وافترى عليه... وبعد تراجع تحت الضغط ... و استولى على مقرها وارشيفها بالبوليس بالقوة خارج نطاق القضاء.... وهاذي جنايات خطيرة....
وكيفاش عمل الأمر نومرو 117 إلي نصب بيه روحو حاكم فردي مطلق .... ومأسس دستوري ... ومشرع....وسلطة تنفيذية.... وحتى سلطة قضائية...ومازال كا ما اعلنش روحو أمير المؤمنين. وكيفاش عمل استيسارة وموش مستعرف بمعارضة ومجتمع مدني يتشاورهم فيها عليها...وبعد ما فشلت قاللهم نجحت... ومعيز ولو طارو.
وكيفاش حل هيئة الإنتخابات المستقلة الشرعية والدستورية... اول مكسب بعد الثورة...واستحوذ على مقرها وارشيفها...بالتواطئ مع ازلام جندهم وعينهم في مكان أعضاءها الشرعيبن بالدستور ...هاكم متاع البوصاع ومساحان البلار... باش يزورولو الإرادة الشعبية الحقيقية مقابل منافع وزرة وكتاب دولة...تزوير كيف ما كان يعمل بن علي قبل... وهاذي جناية لا تسقط إلا بعد عشرة سنين... والدنيا في مراحل الانتقال الديمقراطي راهي كيف الريح في البريمة وحتى لوكان ما تتقدمش شكاية اليوم... باقي عشرة سنين لتقديمها.
وكيفاش حل مجلس القضاء الشرعي المنتخب.. وعوضو بمجلس صوري هو إلي عينو...ومن بعد عزل قضاة متمسكين باستقلالية القضاء... ينوي يعوضهم بقضاة يكونولو طيعيين وينفذولو تعليماتو …
وكيفاش توا قاعد يترفك في دستور متاع بني قاعدي... متاع حكم فردي استبدادي بش تكون فيه جوانب مجتمعية قروسطية... لاربعين عام على قدام ومرشحين هوما وذريتهم باش يكونو من بين ضحاياه... من ضمن شعب ها البلاد…
الخ....موش ما نطولش عليكم... خاطر ما حكيتش زادة على الجوانب الاقتصادية والإجتماعية والمالية الخطيرة... إلي زاد عمقها المنقلب على الدستور بعد الإنقلاب علبه... وباش يبركها البلاد من الناحية هاذي زادة... فبحيث....ها الجماعة.... إما انهم عميان وطرش.. لا شافو لا سمعو...وهذا مستحيل…
إما انهم يتلوقطو....وهذا الصحيح خاطر يعرفو هذا لكل....وعاملين فيها ما شافوهش وما سمعوش. وعاملين فيها بكل صحة رقعة.... كيف هاك الكذاب إلي عينو صحيحة... متغطيبن بالنهضة وسياسة النهضة مع حلفاءها قبل الإنقلاب والمسؤولين على الأزمة قبل 25 ...باش يغطيو على الكوارث الي حصلت بعدها.... و الكوارث الجسيمة المنتظرة... بسبب المنقلب وبتدبير منه..وفاريناتهم ليه.
والغريب انك تلقى منهم شكون مازال يندعي انو تقدمي وحتى ثوري ويغطي ويبرر في سياسة واحد رجعي ومتخلف مجتمعيا.... حتى فروج نساء تونس ما سلمتش من التشهير بيها من طرف حشدو زلي يساند فيه .... وهو بنفسو اتخذ قرارات على أساس معاينات لا اخلاقية لفروج نساء تونس .
هذا علاوة على مؤسسات الدولة الديمقراطية المكتسبة بالثورة ... هو موش قاعد يعبث بيها كيف ما عبثو بيها إلي حكمو قبل 25.. هو كيف ما قلنا.. هذا زميمهم الملهم العظيم... قاعد هابط عليها بماصة.. الواحدة تلو الاخري... ويهدم فيها عرصة عرصة…
وبحيث.... كل يوم وانا نزيد نبهت فيهم... وقت يتذرعو بها الديسكو المكسر متاع النهضة لممارساتها في السلطة قبل 25.. لذر الرماد على العيون... للتغطية على ما يقترفه الممارس للسلطة اليوم... الملهم العظيم.... ضد المصالح المادية والمعنوية للشعب.
وبحيث..... فيق يا رفيق..... راك طلعت من اهل الكهف لما قبل 25 ...والغريب انك زادة تكذب بصحة رقعة... وتعرف انك تكذب. وقت العزوزة هازها الواد.... وانتي تقول العام صابة...
خاطرك راك اليوم تساند وتبرر في سياسة رجعية ومتخلفة مجتمعيا وحضاريا ... و استبدادية سياسيا من كل النواحي .....وكارثية اقتصاديا واجتماعيا على الفئات الشعبية.
وتلبس فيها لروحك...يا والله أحوالك.. قداشها فسفس.