برشة نعرفهم وقت بن علي... كانو صبابة...او يكتبو في صحافة المجاري... أو يكسرو الاضطرابات... أو يرفضو يصححو في مجرد عريضة تطالب بحرية التعبير... وما نحكيش على العرايض ضد الفساد ومناشدة بن علي ليبقى مدى الحياة..
هذا كان ما قالولكش وقت تمدلهم العريضة... انتي متطرف خاطرك تطالب بالحريات وضد الحكم الفردي والرئاسة مدى الحياة... و"تعمل في السياسة"... تتذكروها التهمة هاذي؟ انتي تعمل في السياسة؟ هاو لكلها تعمل فيها اليوم في الفايسبوك والشارع والأحزاب والمجلس... الخ... ويعطيوك في الدروس... ههههههه
نتذكر وقتها البعض منهم... وقت يشوفني من بعيد يبدل الرصيف... ويتفرج في الفيترينات... علاش تفكرت هذا؟
خاطر آنا شخصيا نؤمن بأن كل إنسان قابل يتبدل... وقت يتغير الواقع... ويلزم ننوي الخير في الناس... لكن قاعد نشوف البعض كثرولها من الثورجية... وانا نعرفهم كيفاش كانو قبل الثورة... البعض يعطي في الدروس في الاستحقاقات الثورجية متاعو ويزيد على ما وصاووه ... ولخرين كثرولها من الثورجية ومدخلين الانتقال الديمقراطي في الحيط....
هاذم نحب نقوللهم فقط... وقت تدخل البلاد في الحيط... وترجع للحكم الفردي والإستبداد وتكميم الأفواه والتعذيب والمحاكمات الجائرة...وهذا ممكن لتنامي الخطاب الشعبوي في قصر قرطاج وفي المجلس ولدى الكثير من الأحزاب...شوفو شنوا صار في مصر...
نحب نقوللهم.... ما تقولوش وقتها أنكم غير مسؤولين... خاطركم مسؤولين وما تصرفتوش كمواطنين مسؤولين اكتسبو حريتهم بفضل نضالات غيرهم... وما حافظتوش على المكتسبات الديمقراطية مع غيركم...
ونزيد نقوللهم… الي فيه طبة ما تتخبى…وقتها باش ترجعو لوضعكم الأصلي إلي كنتو عليه وقت بن علي… بدون حرية ولا كرامة…و ريوسكم مدنكسة … كان ما قدمتوش خدمات للاستبداد باش تسلكوها في حياتكم… خاطر الاستبداد ما يخليلكش الحرية… عندو كانك موش معاه انتي ضدو… وينزل عليك…بشتى الطرق…