توا بربي سي محفوظ ناكر فيه دستور القيسون...وما يحبش يقول علاش.... لكن بعد ما سمعت كل ما صرح بيه... طاست مخي فهمت ان الأمر متعلق أساسا بخلاف حول ضمان الحقوق والحريات وقيم المواطنة والديمقراطية إلي ركز عليها سي محفوظ في الإعلام …
والشيخ بلعيد قالو مشى يتلاهى بصحتو وربي يشفيه ويطول في عمرو...وهذا موش على هذاكا... خاطرو حكى مرات ان الدستور دستورو.... وموش متاع تلميذو... لكن تلقاه فهم ان القيسون طفاه... و انو خدم بيه... والله أعلم .
و الزويز هاذم.. فصعو ومسكرين تليفوناتهم على الإعلام .. تقولش عليهم دخلو للسرية.. موش ما يواصلوش الحملة التفسيرية.. بعد ما غالطو المواطنين بمشروعهم.. وصدعولنا وذنينا من بلاتو لبلاتو.... وقت هوما يعرفو... وهذا مذكور في المرسوم... انهم مستشارين و ماعون خدمة متاع حوار مغشوش موجه للغرب إلي عندو صرمية الميزانية وموش للتوانسة ... وأن الدستور راهو متاع القيسون.... وموش ولدهم.
ولاخر متاع خدمتي... ما انجمش نحكي عليه... نعرق في بقعتو كل ما يتكلم ... وثمة واجب الزمالة واخلاقيات مهنتنا تخليني متحفظ... وما يلزمش نحكي للعموم عليه.. الله غالب... لكن بيناتنا حساب... وين ووقت يلزم يكون...
ورغم ذلك يا بوڨلب.. تلقى شكون يقلك الشعب تنفس بدستور القيسون...وانتي موش فاهم منين. وكي تجي تشوف تلقاها رباية على التكمبين... وسياسة الموقع قبل الموقف...وزيد هذا اعتراف منو ومبصوم عليه... انو ظلمة في فهم الدساتير.. وحتى في شمعناه دستور.
وعامل فيها اليوم خاطرو ضد النهضة.. وهو كان في حكومة معاها... ومساهم في "عشرية الخراب"... إلي يحكيو عليها. وتلقي زادة هاظوكم... إلي ماعون خدمتهم مناهضة التطبيع والوحلة العربية مع شيوخ النفط وبول البعير... لا يفهمو في قيم المواطنة ولا في قيم الجمهورية ولا في حقوق الإنسان الكونية... ومتعودين على مساندة الإنقلابات... ورغم ذلك يساندو في دستور خلى اوتوروت للتطبيع.. كان موش أكثر.
وتلقى خصوصا رعية... خاطر لخرين ماركة صفر فاصل ولاّ زايد شوية .. وما ناخذوش عليهم. تقولش عليهم متوحشين وضعهم القديم وقت بن علي... وين ما كانش عندهم حرية...وأولها حرية التعبير....و يمشيو لحيط لحيط... يعني ما يتصوروش رواحهم عندهم كرامة إنسانية .. ومواطنين كاملي الحقوق...في ظل نظام ديمقراطي ما فيهش حاكم فردي... وزيد وقت يقولهم انو حامي حمى الدين.
ومنهم من يندعي أنو ثقفوت.... وهاذم هوما المأساة...خاطر حكاياتهم فيها واو. يندعيو انهم فاهمين كل شيئ... ررغم ذلك ما فهموش انو دستور البني القاعدي أتعس حتى من دستور 59.. (وموش نحكي على دستور 2014 المتقدم عليه نوعيا في ضمان حقوقهم وحرياتهم والآليات الدستورية إلي تضمنها)…
مثلا ننصحهم يعملو مقارنة بين الفصل 7 من دستور 1959... والفصل 55 من دستور البني القاعدي..تو يلقاو الفصل القيسوني متخلف عليه. وطبعا لا مقارنة بالفصل 49 من دستور 2014.. إلي يمثل نقلة نوعية على الفصلين... متلاءم مع الشرعة الدولية للحقوق المدنية والسياسية، والاجتماعية، والثقافية، والبيئية.. خاطر ما يكفيش انك تذكر الحقوق في دستور وتسرسطها... حتى وقت بن علي كانت مذكورة....
الأساس انك اتدستر الآليات والهيئات إلي تضمن احترامها... باش ما تتعديش عليها أي سلطة بالقوانين او بتأويل القوانين... كيف ما كان الأمر مع الفصلين الخامس والثامن من دستور 1959... إلي حلو الباب للإعتداد على حرية المعتقد والضمير... وللتعذيب والمحاكمات الجائرة بعشرات الآلاف...و مصادرة حرية التعبير....ومصادرة كل الحقوق والحريات.. لخ ..
لكن الخطير جدا... وهذا ما كانش موجود في دستور 1959... انهم الثقفوت معدومي المفهومية هاذم... لوكان جاو يعرفو يقراو الدساتير... والتاريخ...راهم فهمو أنك وقت تحط في الدستور أنو الآداب العامة ومقاصد الإسلام كيف ما يفهمها صاحب التأويل... يعني الحاكم الفردي وأزلامه وزبانيته إلي معينهم...للحد من الحقوق والحريات بالقوانين.... تحط وقتها اوتوروت موش فقط لنسف تلك الحقوق المسرسطة في الدستور.... وإنما أيضا لتغيير النمط المجتمعي التونسي...والرجوع بيه موش فقط لما وراء الإنقلاب.... ولا حتى لما وراء الثورة... بل لما قبل دستور 1959... يعني لما قبل الإستقلال... وقبل حتى الطاهر الحداد.
والدليل الإضافي؟ حذف الفصل 2 من دستور 2014 المتعلق بالدولة المدنية وغير القابل للحذف. تي حتى النهضة إلي وافقت على دستور 2014... تراجعت في الحوار الوطني علي حطتو في المشروع الأول للدستور... وقبلت بالفصل الثاني متاع الدولة المدنية...وخصوصا بالفصل 49...ومارَالت لليوم متمسكة بكل الدستور....
ولي باش يقلي النهضة تتنوفق وكذا.... نقلو الله أعلم ما في الصدور.... لكن الثابت اليوم....ان قيسونهم إلي يعملولو في الفارينة... نحى الفصل 2 والفصل 49...وموش قابل في 2022 بلي قبلت بيه النهضة في 2014!!!
وخصوصا نقول ليهم .... زعمة انتم متحقين انكم ك "تقدميين" شالقين بهذا؟ وزعمة انتم اتدافعو اليوم اكثر من النهضة علي الحقوق والحريات ومدنية الدولة ... وقت ما تعارضوش دستور المقاصد والآداب العامة؟ وراني ما نيش نحكي علي يساندو فيه بنعم.
هاظوكم باش يتطورو في مجال الدولة المدنية الضامنة للحقوق المدنية والسياسية والدولة المدنية... يلزمهم يبداو قبل كل شيئ... واولا... بتكوين عند النهضة...خاطرهم ما زالو في الفڨونة لخرة متاع الحقوق والحريات والدولة المدنية في تونس.... وبعد تو نشوفو وين نبعثوهم يزيدو يتعلمو... ضحكتني برشة هاذي.
فبحيث...تندعي انك تقدمي وكذا..وضد النهضة وكذا...يا مهف؟.. وتنظرلها؟....وانتي مساند دستور القيسون؟ آنا نقلك انك تخرط فيها ثقفوتيا... وكان ما تعارضش دستور القيسون.. وبشدة زادة... انتي متخلف في الدفاع عن الحقوق والحريات والمشروع المجتمعي... على النهضة .
فيق يا رفيق. وبحيث... وينكم زادة انتم يا حقوقيين؟ ....زعمة حتى انتم زادة؟ وهاذي قصة أخرى…