نحبو نعرفو شكون يصطاد في الماء العكر سي إلياس..

Photo

زعمه موش يصطاد فيه...الوزير إلى يندعي أنو ما يعرفش إلي مولى معمل الكمامات نايب...وأنو ثما تضارب مصالح ممنوع بالقانون...ولوكان ما يعرفش إلي دور السلطة التنفيذية... تنفيذ القوانين وموش خرقها... مالا علاش بربي هو وزير؟

زعمة موش يصطاد فيه... النايب مولى المعمل إلى قبل باش يبيع مليونين كمامة للدولة... وهو يعرف إلى ثما تضارب مصالح؟ ولوكان جاء نايب شعب بالحق موش نايب يدبر في راسو والدولة عندو غنيمة...موش راهو سيديجا خدمهم الكمامات أو جزء منهم حسب ظروفو... بلاش... وهداهم لوزارة الصحة كمساهمة منو كيف غيرو؟

زعمة موش يصطاد فيه... مولى القولة الشهيرة هاذي مبارح... إلى باش تبقالو في جبينو...خاطر تذكرنا بعبارات بن علي ضد حرية التعبير... وببوق دعايتو وكالة الاتصال الخارجي الكذابة سيئة الصيت؟

وهذا وقت يغطي على وزيرو متاع الصناعة نتاعو...وعلى النايب مولى المعمل...بدعوى أننا في حرب والحرب تسمح بتجاوز القانون (مالا علاش سيادتو طلب المراسيم ضد الكورونا؟) …

ووقت يستعرف ضمنيا في نفس الوقت بتضارب المصالح الممنوع بالقانون في الموضوع؟ ... وقت قال أنو ينجم في كل وقت يغيير القانون بمرسوم... ويقصد في ما يخص الصفقات العمومية و منع تضارب المصالح؟!! وزيد يا بوقلب... يلمح أنو ينجم يخرق الدستور بتشريع تضارب المصالح... يعني فساد الدولة... بالمراسيم!!!!

خلينا نكونو واضحين سي إلياس…

الحرب على الكورونا راهي موش على حساب دولة القانون والدستور...وعلى هذكا انتى طلبت الحق في إصدار المراسيم...وهذا كان لازم... لكن نذكرك أنو التضامن الحكومي بالتغطية على وزير... راهو موش أعلى من واجب احترام القانون والدستور...وخصوصا في زمن الحرب...خاطر الحكومة ووزرتها في رأس قايمة إلى موش على ريوسهم ريشة...خاطرهم يلزم يعطيو المثل للمواطنين....

وخصوصا يلزمهم يعطيو المثل للمواطنين وقت يحطوهم في حجر شامل عمرو ما صار... ويطالبوهم بالالتزام بيه...ولي يخالف منهم يطبق عليه القانون بصرامة.. والحكومة كل يوم قاعدة اتطبق فيه وتفتخر بيه....

ووقت تقول سي إلياس أنو الحرب هاذي تنجر عليها اخطاء... ويلزم ناقفو عليها ويلزم نصلحوها ويلزم نتجاوزوها... كلامك هذا راهو صحيح... لكن يلزم إنتي تعطي المثل بيه ...انتي في راس القايمة…

كان عليك تقول بصراحة انو وزيرك عمل غلطة قد راسو...وما تصرفش كسلطة تنفيذية دستورية في وقت أزمة...وما عطاش مثال للمواطنين...

وموش بالعكس... وجهك يحمار وتغضب... وقت إثارة الموضوع... واتطلع في النبرة... وباحتقار زادة ضد إلى عبرو على رأيهم وكأنك تخاطب فيهم من وراء البلايك... واتطيح يا بوقلب تبرر في الغلطة بنامبورتوكوا...يعني بالقجمي بالهزان والنفضان…

وهذا راهو خطأ سياسي واتصالي من الوزن الثقيل... خاطر تكون كلي يصطاد في الماء العكر...نتاعو...في دولة قانون ومؤسسات... وخاطر في تونس ثما حرية تعبير... ولي يعبر على رايو... خاطرو مقتنع بيه... موش خاطرو يعوم في مستنقع...

واجبك راهو تبعد الشبهات على حكومتك…خاطرها بقات الشبهات بعد كلتمك… وزادت قوات في بعض الأوساط… ولي موش باش تسكت راهي… وانتى تعرف انو في السياسات الحكومية في الدول الديمقراطية (خلافا لدول البنان) وقت تكون ثما شبهات فساد لاصقة في المسؤولين إلى يحكمو… راهو الشعب ما يتجاوبش… وفي زمن الحرب أكثر وأكثرين…ويلزم التخلص من الشبهات… هكا نصلحو الأخطاء ونتجاوزو في مثل المواضيع هاذي…

خاطر الدولة فوق المسؤولين…. وموش المسؤولين فوقها… كيف ما قلت إنتي.. وهذا رغم إلى بالطبيعة كل إنسان بريئ إلي ان تثبت إدانتو او براءتو… وهذا موش من صلاحياتك باش تنظر فيه… هو خاص بالقضاء دون سواه واحنا عنا تفريق سلطات…

هكا الأمور تسير في الدول الديمقراطية… وخاطر زادة ونعاودلك كلامك.. حتى حد ما فوق راسو ريشة…وانتي سيد العارفين…

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات