بربي شفتوش رئيس دولة يؤدي زيارة رسمية للخارج... يوم ذكرى وطنية رسمية في بلادو؟ مع العلم ان الزيارة تقرر قبل مدة... واختيار تاريخها يحدد بالاتفاق بين الطرفين... أيا يا سادة يا مادة.... هاو الإخشيدي دشنها.... واختار اليوم الوطني لإحياء ذكرى الشهداء يا بوڨلب... يوم 9 أفريل المجيد... باش يمشي لمصر...وزيد عند المجرم الجزار السيسي!!!
واكتفى بتلاوة الفاتحة على أرواح الشهداء في السيجومي بحضور غريميه رئيس المجلس ووزيره الأول رئيس لحكومة... وقبلها تلى الفاتحة علي قبر شهيد ثورة وزار عايلتو…
وبعد طار مزروب لمصر... بدون حتي توجيه كليمة صغرونة للشعب الذي يريد...وهانا ما طلبناش لكل الشعب رغم انو بالدستور رئيس التوانسة لكل... رؤساء بكري... وحتى ولو اني نختلف معاهم ...كانو يتوجهوا علي الاقل بخطاب للمواطنين حول دلالة هذا اليوم للحركة الوطنية ضد الاستعمار...وينظموا اشياء في هذه المناسبة…
وما تقولوليش الكورينا تمنع ذلك يا من تريدون ... خاطر الكمامة والتباعد في الهواء الطلق في جنان قرطاج في يوم ربيعي كيف اليوم أعلنت عليه الميتييو منذ ايام... تخليكم في التسلل لو تجرأتم على قول هذا…
عاد وخيكم... بعد ما قام الصباح... وبعد ما اطلع على الانباء هاذي... لعبت بيه التخمينات والهواجس غير البريئة... وبدى يتساءل بينو وبين روحو... زعمة الإخشيدي ماعملش خطاب حول اسباب سقوط شهداء 9 أفريل ومغزاه.... خاطر استشهدوا ربي يرحمهم وينعمهم... من أجل المطالبة ببرلمان تونسي...وهو ايديولوجيا ضد وجود البرلمانات أصلا؟
ووقتها ما ينجمش يحرف التاريخ.... وخصوصا ما ينجمش يقول انهم سقطوا شهداء من أجل حاجة هو ما يؤمنش بيها أصلا؟ ولاّ زعمة فصع مزروب لمصر يوم أحياء ذكرى الشهداء... خاطر الشيخ هو رئيس البرلمان الحالي وشادد البقعة...وهو موش عاجبو الشيخ في البقعة...ويلزمو يكبر بالمجلس المنتخب ... يعني بالشيخ بالتبعية؟
ولاّ زعمة اختار السيسي موش دولة أخرى في نهار ذكرى الشهداء من أجل البرلمان... خاطرو جزار الإخوان؟... (والسيسي جزار كل المعارضات أيضا... وهاذي إشارة لبعض الإخوان الي حتى المظلومية يحبو ينفردوا بيها بش يخدموا بيها .. ههههههه )... زعمة اختار السيسي نكاية في الشيخ؟ ويحب ينزلو على الجرح المؤلم في نهار كيف اليوم... وقت هو رئيس البرلمان الي استشهدوا من اجلو توانسة ؟
ولاّ زعمة هارب من الاحتفالات الرسمية لخرى متاع العادة.... إلي بالضرورة تكون بحضور الرئاسات الثلاثة... وهو ما يحبش يشوف وجوه المش والشخ... ولو من بعيد بسبب التباعد الكوريني؟
ولا زعمة لكلو مع بعضو؟... ولاّ أسباب أخرى؟
هو ربي وحدو يعرف ما في الصدور...لكن إلي باش يستنى تفسير رسمي ولو من للة نادية...نقلو راهو يبطى... ولذا.... اقعدو كوجيتيو كيفي....تستاهلو.... رئيسكم وانتخبتوه... آنا صوت أبيض... ههههههه
ملاحظة اخيرة... للرعية الإخشيدية إلي تهلل...والرعية البنفسجية وفارينتها إلي تهلل زادة... والرعية الزرقاء والباراشوكية إلي تندد... طبعا هذا ما يعنيش انو الرئيس ما يلزمش يقوم بزيارات للبلدان الشقيقة والصديقة بمن فيها مصر... بل هذاكا واجبو...وهو منذ انتخابو مقصر فيه برشة...
لكن اختيار التواريخ... عندو رمزيتو ودلالاتو…
وخصوصا ما يلزمش السياسة الخارجية لتونس تخضع للتجاذبات الداخلية المرتبطة بسياسة المحاور....و المؤشرات بدأت تتراكم وتبين انو الإخشيدي زادة قاعد يسقط فيها بالڨزحة بالڨزحة... وهذا كانو صحيح تو نزيدو نتأكدو منو في المستقبل القريب.. جديا الآن... السيادة الوطنية أيها المتهافتين على المواقع السيادية في الدولة التونسية... فوق جد والديكم لكلكم على بعضكم...من انتم حتى تستهترون بها؟
لقد انطلقت المطالبة بها في مثل اليوم... في 9 أفريل 1938...بسقوط شهداء وطنيين من الشعب... الذي كان بالرسمي يعرف ماذا يريد…
استهتاركم جميعا بإحياء هذه الذكرى اليوم.... يكشف عن طينتكم... وماذا انتم تريدون حقا !!!!!