التغريد خارج السرب..

الراجل يقلهم أنتم منافقين والبرلمان لازمو يتحل وماثماش حكومة وماثماش محكمة دستورية وما ثماش علاقات خارجية وما ثماش مساعدات دولية وما ثماش قروض لأني المؤسسات المالية العالمية مشترطة الاستقرار السياسي وتناغم مؤسسات الحكم، ويقلهم كل القوات الحاملة للسلاح تابعتني ويقلهم وزير أول موش رئيس حكومة، ويقلهم الحزب الفائز لازم يرحل ورئيس البرلمان لازم يرحل ورئيس الحكومة لازم يرحل،

ويقلهم عشر سنوات الي قاتلتوا فيهم باش الثورة ما تلحقش على بقية الثورات العربية بلّوهم واشربوا ماهم،ويقلهم أيْ نكذب عليكم في الجواب المسموم وما نعطيشو للنيابة ونكذب عليكم في تلقيح الامارات وما نعطيشو لوزارة الصحة ونكذب عليكم وعلى الفخفاخ ونقلو راك انت استقلت وهو ما استقالش ونقلو اسكت تو الملف متاع التضارب يرقد وكان تقول آحليلي والا تتوجع نجبد الملف، ويقلكم حماية موش استعمار، ويقلكم ما نوقع ونصحح حتى على قرار أو مرسوم أو أي وثيقة صغيرة أو كبيرة، ويقلكم الانسداد والاختناق حتى الموت او الاستسلام، ويقلكم الدولة يا تموت تحت يديا يا تستسلم ليّا بلا مقاومة ولا مناوشة ، طاعة عمياء كاملة غير منقوصة.. هو مدور بيه نساء باش يدمر التجربة ويقضي على الثورة.. وهوما يقولوا لا خاطيه كمال لطيف!!!!!!!!

هو يقول هذا الكل....

وهوما بطلوا من هذا الكل ويحكوا على سكرة وعلى كمال لطيف وعلى فرانسا!!! آخي مانا عايشين عشرة سنوات تحت مؤامرات لطيف وتحت تلاعب فرنسا ونطيحوا ونقوموا والتجربة ماشية، ونقدروا نصارعوهم قرن من الزمان، وكل ثورة، بل كل دولة فيها لوبيات الصراع معاها ما يتمش حتى الديمراطيات العريقة فيها لوبيات وعندها دول امبريالية تحارب فيها.

راكم جايين لطامة تنظفوا فيه وتخرجوا فيه مسكين ديمقراطي حقوقي يحترم الدولة وعندو اخلاق يحترم بقية المؤسسات وشخصيات الدولة، والأشرار لعبوا بيه وغلطوه!!! لا يا جماعة ما غلطوشو هو في تركيبو كائن هرقلي كسراوي هولاكاوي موسيلاوي تشاوسيكاو قذافاوي.. فقط ما يفصله عن هؤلاء انهم طواغيت شجعان غامروا من اجل جنونهم، وان الجبن أقعده عن القيام بأي خطوة لتجسيد جنونه، فقط هو تحين وخنس حتى تمكن فولغ.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات