هذا هو الفرق بين عائلة بن علي بالمكياج ومن غير مكياج..

Photo

آخي كيفاش بن علي نزل للمستوى هذا ورضا يعطي بنتو لكادوريم، وكيفاش يرضى يظهر بالصورة هذيكا؟ السؤال غالط! السؤال هو : كيفاش طلع بن علي للمستوى هذاك"قبل سبعطاش" وكيفاش خرج بالمظهر هذاك وقت خذت بنتو ولد الماطري؟

الجواب هو الدولة وما ادراك ما الدولة..

الصورة الثانية مع كركوبة الوشام هي اصدق بالف مرة من الاولى، الصورة الثانية تخلص فيها بن علي من اتيكات الدولة وماسك الدولة ومقدرات الدولة ومتطلبات الدولة ومخادعات الدولة، في الصورة الثانية ماكانش ثم حتى ضغوطات ولا استحقاقات، الصورة الثانية ظهرت فيها العائلة على حقيقتها عارية من الدولة، هذاك هو المواطن بن علي والمواطنة ليلى، هذيكا هي اخلاقهم وهذاك هو كارهم وهذاكا هو دومانهم،

Photo

تسرح بنتهم مع كتلة متاع وشام، تنشر تصاورها شبه عريانة وتعدي اشهر تطلفح من بواطة لبواطة ومن وتيل لوتيل مع كركوبة متاع راب مغشوش، وبعد يتلم شمل العائلة ويخرجوا بصورة باش تخرس السن السوء، الي ظنت في الطفلة حاجة خايبة.

Photo

بالنسبة للصورة الاولى، الجبب والروب الي لابسينها والشعار الي وراهم والعلم والعقولية والبرستيج والأسرة الطيبة الوديعة الي تشبه العائلات التونسية الارستقراطية النظيفة، الابتسامة الهادئة المطمئنة الي بعيدة على الضحك الشعبوي وبعيدة على التكشيرالدكتاتوري..هذاك الكل مكياج الدولة..

كي تحب تعرف حقيقة الممثلة وإلا عارضة الازياء وإلا حتى العروس الي دلست ما استعملتش المكياج العادي، ماك تنحي ليها الاجهزة الكل، تخليها اوريجينال، تغسلها غسيل دوارة في الواد، تنشفها، تنشرها وبعد تحكم عليها..

Photo

هكاكا العائلات الحاكمة، نحيلهم السلطة، خرجهم من مؤسسات الدولة كي الشعرة ملعجين، اغسلهم غسيل دوارة في الثورة، وبعد احكم عليهم.. الصورة الاولى فوتوشوب دولة،عائلة مْكْيجة بالسلطة، الصورة الثانية طبيعة عائلة كانت حاكمة وغسلتها الثورة من مساحيق الدولة.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات