سي الباجي، وباش يعدي مسألة الميراث ويسلخ آية النساء ، نادى على الشاهد نادى على مرزوق نادى على الطبوبي نادى على اغلب الاحزاب التونسية وأغلب رؤساء وأمناء المنظمات المدنية والاجتماعية، وصل صوتوا للجامعة العربية للبرلمان الأوروبي للكثير من الهيئات الدولية، طمع حتى في مالطا! مشى للأمم المتحدة مشى لجنيف يحب يعدي القانون!!!!
مانعرفوش عليه سي الباجي مخلي الحل قدام عينيه ومشى يفتش عليه في بلاد الشاق واق! علاش سي الباجي ما يمشيش ديراكت للشعب، استفتاء وانت مرتاح في دارك، لا يبخصك ولد زايد يقلك ماك جبدت بيا قبل، لا تذل روحك عقاب عمرك عند لgورا، تتوسل فيهم بجاه ربي عاونوني باش نصنصر كتاب ربي .
والله وكان عملت عقلك شوي لعل ينوب عليك ربي بخاتمة باهية، خير ليك من التبهذيل في الدنيا والله اعلم بغادي شنو..راهي الناس كي تكبر ويقرب ميعادها، تولي تحارب في بليس في الذنوب في النميمة في الكذب في الشك في الخيانة في الغدر..موش تولي تحارب في سورة النساء! تقول عليك تسابق في الزمن ثمش ما تنوب عليك النفس الامارة بالسوء تخطف آية وإلا اثنين تصنصر سورة وإلا سورتين باش تقابل بيهم وجه ربي....
سي الباجي آخي شبيك سيبت 113 سورة وشديت في سورة النساء؟! وفوق هذا الكل، تو كي يسألك ربي سبحانو يقلك علاش تصنصر في صورة النساء؟ تقلو باش نجيب حق النساء!!! تو ركز معانا سيد الرئيس، هاو دخلك الشعب من الباب الكبير في الانتخابات وباش تخرجك النساء من الباب الصغير، تزنْ عليك النساء ليل ونهار باش تحطلها ولدها رئيس دولة، وماشيا جايا عليك النساء في القصر بالتقارير باش تشطلب ليهم سورة النساء من المصحف!!!
برا سيد الرئيس خلي عليك من النساء وشد سبحة تنفعك يوم غدوة.. سيد الرئيس زيد ثبت شوي في النساء الي عاملين القصر خرار مرار يحبوا يفسخوا سورة النساء، ثبت فيهم اسّاعة هوما نساء وإلا مشهم نساء، سيب عليك من بن تيشة ما توخذش رايو، نادي واحد من الحرس الرئاسي وقلوا ثبت معايا تره!!!
تو تشوف المفاجئة الي ما تخطرش على بالك!!!!! وبعد هذا الكل سيد الرئيس ، خلي النساء للناس الي تفهم النساء، آخي انت ما قلت ما هي إلا مرا..سيد الرئيس اتق الله قبل ما يفوت الفوت.