وقت لتفشل في المدني بالطبيعة ماك تمشي للعسكري، أما الفرق أنك في المدني قادر باش تكون أنت، وفي العسكري ما تكون كان هوما استحالة تكون انت.. وماك تعرف الي ماثماش عسكر يصطاد لـ ربي.. وتعرف الي العسكر ما عندوش حرية تعبير وعربدة واضرابات و60 جمعية وتمثال بن خلدون وتلويث وحرقان ونهبان في الليل وهاك الرويق الي تسيب فيه والعصي الي تحط فيهم في العجلة.. رغم ذلك انت قابل بيه!
علاش؟ لأنك بلا كرامة ما يهمكش في روحك تسكت تتمرمد تتهنتل تسكر فمك للممات، المهم خصمك لحارق ليك قلبك يسكت حتى هو! تيْ كيما وقع في عهد بن علي، كي الجنرال سكّت خصمك مشيت انت للكارطة والدخان والشيشة حتى لجت الثورة مشيت دسّيت الشكبة تحت الناب متاع التلفزة وجيت تعمل في السياسة.
راهم من كثر ماهم فاشلين في المدنية والحرية والديمقراطية.. وين يرموا يديهم يجبولنا عسكري والا أمني!
مشهم هوما الي جابوا لطفي براهم؟ لا لا! خلينا قبل من لطفي! مشي جبهة الانقاذ عام 2013 كي شدت الترويكا في احمد المستيري الله يرحمو وشدوا هوما في محمد الناصر، قالوا ما تفهامناش نجيبوا اسماء اخرى، أي ماي النهضة اقترحت عبد الرؤوف العيادي وهوما اقترحوا الزبيدي الي كان وزير دفاع وزاد رجع وزير دفاع! وبـــــــــــــــاعد باش جاء لطفي براهيم الي وقتيتها وزير داخلية، بعثوه للخليج بالدّر ڤة على الشاهد، مشى زكاه محمد بن سلمان ومحمد بن زايد وحب يتعدى للجزائر سكرت عليه اللعب كيما عملت مع محسن مرزوق عارفة اجنداتهم شنو وعارفتهم عاملين الجزائر قنطرة يتعدو عليها.
باهي شدوا في وزير الدفاع وبعد تعدوا لوزير الداخلية! طلعتش قرعة! أيْ تقول انت شعفوا؟ لا ابدا! زادوا رجعوا للزبيدي، هالمرة موش باش يرشحوه رئيس حكومة هالمرة رئيس دولة، آخي موش لسعد اليعقوبي قال للطبوبي ماكم عملتولنا كارثة كي رشحتو الزبيدي ومشيتو معاه وما جبتو بيه شيء!!!
بالله لحظة!!! خليني نرجع لتاااااااالي ! موش الجنرال رشيد عمّار قال راهم في 2011 قالولي النتائج ماشية للنهضة منع لبلاد شدها انت!!!
باهي هات نرجعوا تو.. معناها تقول انت تربوا وخذوا الدروس من فشلهم وجنحوا الى المدنية؟ تيييي لا يا راجل! بعد ما داروا بالجنرال الغول يمين ويسار لفوق لتحت، بيبو ليه شاوروا ليه زفرو عليه بعثوا ليه.. شيء، طلعوا بطلعة اخرى!!!
خير ان شاء الله؟! وهوما وجوه خير؟!باش يجي في جرتهم الخير!
قالك ياسيدي بعد ما داروها من الداخلية لقيادة الاركان لوزارة الدفاع، قالك خلينا نجربوا البحرية!!! أيْ أيْ كلوا كبّوط في البر مشوا للبحر! مشوا دبروا واحد متقاعد من جيش البحر لصقوا ليه بالتل والحبل والسكوتش كلمة "أميرال" وجابوه وجو! قالك البلاد ما ينقذها كان الاميرال كمال العكروت!!! وتو هانهم يدادو بيه.. تي علاش ماشين بعيد، حتى الرئيس الي متخبين وراه، ماهمش متخبين وراه بصفة رئيس دولة! تئْ لا لا! بصفتو القائد الاعلى للقوات المسلحة، وبعد كي يحبوا يهدونا يقولولينا، نحن رانا جماعة القائد الاعلى لجميع القوات الحاملة للسلاح! يقلولها بالقوي وما تحسهمش حاشمين حتى طرف!
هوما ماهم من نهارهم قوادة ما فيهمش راجل يقول هاني هنا، ديما يجيبوا شكون يتخبوا وراه يقولوا هاهو! تكلمهم يقلولوك تو نجيبولك فلان يوريك!!! ومازال بيهم العار حتى لجابلولنا فلانة باش تورينا!
باهي تو المثل متاعهم ورموزهم ماو زوز مشير "حفتر والسيسي"وواحد عقيد "القذافي" واحد فريق "بشار"، و ماهم دارو على الرتب الكل جابوها وتخبوا وراها وحبوا يعملوا بيها انقلابات ويدخلوا وراها الانتخابات، من قائد السلاح الكل الى وزير الدفاع الكل الى وزيد الداخلية الكل الى عسكر البحر شوي، ماهم كملوها الكل، ماعاد ليهم حتى شيء، تقول انت تم ماعادش يجيبوا حتى واحد عسكري تو يرجعوا للمدني!
لا يا راجل، ما يحيروشّ غدوة يجيبولك واحد من الحشد الشعبي، وكان ما تفاهموش معاه يجبوا واحد من فيلق بدر! ما يحيروش ما يحيروش، المهم واحد يشموا عليه ريحة البارود.