يعطكم فضيحة

Photo

ڨالك تونس بقى يتبع فيها حنبعل حتى لمات، وجرا في جرتها اميلكار حتى حفت رجليه، وهبل جرجير وهو يبعث في الجبهيات وڨعد يطّمع في سبيطلة ويترڨب حتى كلاه الموس..وكي جوا صحاب سيدنا النبي صلى الله عليه وسلم يخطبوا فيها جو سبعة! أي أي! سبعة لا واحد لا اثنين.. وزيد سبعة عبادلة، لكلهم اسمهم عبد الله!

تونس هذية قعد عبيد الله المهدي عقود وهو يخاوت فيها وبعد تكسر على اسوار القيروان وهز الڨاتلة ومات في القاهرة...ما نحكوش على الفرانسيس الي 75 سنة وهوما يجْروا في جرتها ويتحايلوا ويهددوا ويوعدوا ويتوعدوا فيها.. وفي لّخر روحوا وهزوا امتعتهم الكل، خلوا كان الشقوفات لمصددة هانا نعانوا فيها لتو!

تونس هذيا الي طلبتها الفرسان والطواغيت والاجلاف والقادة وتكسروا ومشوا وڨعدت هي، تونس هذي، بالصمود والعناد والتمنع هذا، عيط محمد بن زايد على قفراش وولد حليمة، عطاهم 37 دينار و500 مليم وڨالهم برّوا جيبوها بكامل زينتها!!!!!!!!!!

تو خلينا من أحمق أبو ظبي وين هو وين تونس ووين التاريخ.. أما ها الضياع هذوما، ما فيهمش شبه راجل يوقف يڨلو كيفاش نجيبلك تونس بكلها وزيد بزينتها!!! بــ 37 دينار! ما يڨدش يڨلو 37 دينار راي ما تجيبش دبوزة متاع كحل باش تجيبلك تونس بزينتها!

يا ولادي رآكم عملتوا العار، وطيحتوا النيفو متاع الخيانة في تونس، طلعوا السوم وسمنوا الفكتورة الله لا تربحكم، القوادة متاع مصر واش يزيدوا عليكم يلعبوا بالمليارات، وأنتم باعثكم ضبع الامارات باش تجيبوا تونس بكلها، بحق كيلو دوارة وراس علوش وباكو حلقوم!!!!!!!!!!!

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات