هي لكلها محاولات للخروج من الاشكال الي حطو فيه رواحهم، يبدو ماكانوش يتوقعو باش يخرج الامر عن السيطرة ويتشعب بالطريقة هذيكا. من هاتف الرئيس الجزائري اصبح مستحيل التراجع ، لازم يهربو لقدام ويركبو سيناريو مقبول.
وباش نربطو هذا بهذا، اليوم الصباح سامية عبو وهي من هي في قربها للرئيس، قالت لخلود مبروك مقدمة برنامج 90 دقيقة على راديو "ifm" ما تسالنيش على الطرد المسموم !!! واضح لأني باعة فاشلة ما تحبش تتورط فيها.
أما هات نشوفو كيفاش هربو لقدام بعد ما انتشر الخبر عند وسائل اعلام عربية ودولية ورؤساء ومسؤولين.. مجلس الامن القومي انعقد يوم الاثنين في نصف نهار وأنهى اشغالو في نفس اليوم الساعة الرابعة في العشية..
الحل شنو ؟
ما يقولوش 6 متاع لعشية وقتيتها الناس مروحة والا لاهية تحل في الجوابات! وما يقولوش 4 متاع لعشية لاني الناس الي معاهم شاهدة عليهم، ولاني نادية كيغير وقفت من الاجتماع ما غادرتش القاعة..
امالا السيناريو يركب كان الخمسة متاع لعشية!
4 ساعات اجتماع، مجلس امن قومي، وبعد خرجت تشوف في جواب جاي في الكوليي من الصباح وما لقاش شكون يحلو، يترقب في الشخص الثاني في قصر قرطاج الي فيه 3000 موظف باش يحلو!
ركز هنا نتحدثوا على رسائل عشوائية، مستحيل توصل ليهم وما عندهمش وقت ليها أصلا. بما اني الرسائل المهمة بالمعنى "الاداري" ياخذوا شعار بيها، من خلال الارساليات القصيرة او البريد الإلكتروني …
وكي نركزوا اكثر! عملية الفرز راهي ما تمش في مكتب البريد وخلاص! لا لا.. البريد الي موجه للرئاسة عندو خصوصياتو، حتى البريد المعلَّم الموجه ما يتعداش طوالي، يتفحص.
خلينا ماناش باش نرجعو للسيناريو متاع كيفاش قراتو وكيفاش لوحاتو وكيفاش ڨطعاتو وبعد كيفش رجعاتو وقالو راهم سلموه للجهات المختصة والجهات المختصة قالت ما وصلني شيء....
"حوالي الساعة الخامسة مساء" راجعو صفحة الرئاسة، كل الكثير من البيانات والنصوص المرفقة تحمل التاريخ، اليوم والشهر والسنة، لكن لم يتم ارفاق التوقيت ولا مرة "على الاقل في ما تمت مراجعته"، فقط لما تطلب السيناريو تفصيل التوقيت، ارفقوا " حوالي الساعة الخامسة مساء ".