كان عنا واحد من الاخوة زمن التهجير كيف تحصل على اللجوء بدا يفكر في الزواج، مازال صغير وباوراقو..عاد عمل سقف عالي في شروطو، هاو يلزم طولها يكون كي فلانة وقشرتها كي فلانة وعينيها كي فلانة ..
أيّا سلع ليها من كل بضاعة شوي.. أيْ.. تراخى هو وبدت الاشهر والسنوات تمر…وبدا خونا يطيّح في السقف حتى قرب يسويه بالارض……. عاد كي غلباتو السنوات وبدت الامراض تهجم، رمى الندشة باش يشوفولو مراة للزواج.. قالولو شنو شروطك… قالهم شرطي الوحيد ان تكون أنثى!
هانو عاد زعيم الانقلاب عندو شهرين وهو يدور في حساباتو، العباسي قالو نتعدى على البرلمان ونشد رئيس حكومة وما نشدش وزير اول، شرف الدين قالولو لقراب منو الدنيا الكل الا هذاك! نزار ما قبلش بشروطو واصل موش متشجع ليه شاد عليه بونتو كيفاش ما واصلش معاه، كلثوم كنو هو ماحبش رفضها يمكن على خاطر محروقة…
هانو في الاخير قال المهم ان تكون انثى.. وهانو مشى للاتحاد التونسي للمرأة عطوه وحدة مضمونة.. ويلزمها تكون اقل منو في التكوين السياسي ومطيعة وما عندهاش آفاق ولا عندها طموح كي المشيشي.
هو ماو تاجر بالفساد وتاجر بالدستور وتاجر بالاغتيالات وتاجر بالتلقيح وتاجر بالصلاة وتاجر بالعسكرة.. مازالت المرأة هانو تاجر بيها! قال نحط ليكم مرأة وزيرة أولى وتسكتوا على الانقلاب..