مع السخانة الاستثنائية متاع الايامات و متاع الظروف السجنية الخاصة و الإكتظاظ و أخبار المساجين اللي توفاو من السخانة و خاصة مساحين موقوفين في ذمة البحث (موش احكام باتة) .. ياخي قولولنا وفات الإنسانية في ها البلاد ؟ ما عادش نحسو و إلا شنيا المصيبة و إلا دعوة الشر اللي مستنا ؟
وقت ثما ظروف استثنائية متاع طقس استثنائي و انت ما عندكش إمكانية باش تخفف على العباد ؟ ما ثماش مسؤول يا رسول الله يأخذ قرار استثنائي ؟ صعيب باش نقررو تناوب استعجالي في مطالب الإفراج في العطلة القضائية ؟ صعيب قرار لتسريح الموقوفين على ذمة البحث الأولي قبل المحاكمة و تقديمهم في حالة سراح ؟
صعيب تخفيف نسبة الإكتظاظ بعقوبات بديلة عندنا سنين نحكيو عليها ؟ ثما 33 ألف سجين بينما طاقة السجون 17 ألف علما و ان عدد المساجين كان 22 ألف في 2022 و علما أن 55% من المساجين في إيقاف تحفظي.
صعيبة قرارات استثنائية إنسانية للمسجونين كبار السن ؟ و ما نحكيش على القفة ؟ اللي هي قطعة من عذاب العائلات و خاصة في الظروف هاذي ؟ و ما نيش باش نسأل علاش دولتنا ما تنجمش توكل 33 ألف سجين ماكلة لائقة ؟
علاش استسهال السجن ؟ علاش ولينا هكا ؟ علاش قلة الرحمة مع بعضنا ؟