باهي لمّا مُدوّن يكتب تدوينة يصف فيها نائب بـ "كلوشار (ا)" وإلاّ ينعت نائب آخر بالـ "السفّاح" وإلاّ يقول على نائب أنه "فاسد" و"كناطري" "وبيّاع زطلة" و"صبّاب"..الخ يضرب عامين سجن... وخطية!!!!
ولمّا نائب يقول لزميله النائب (ة) "يا كلوشار(ا)" وإلاّ نائب يقول لرئيس البرلمان "يا سفّاح" وإلاّ يتّهم كتلة برلمانية بـ «الفساد" أو ينعتهم "بالباندية" وإلاّ يقول عليهم "خوانجية"... هكّة بشكل مجاني وبرشة شو وتمسريح وفي التلافز وقدّام عشرة مليون تونسي من بينهم 3 مليون مدوّن... المفروض يتحكم عليه مؤبّد ديراكت ومن غير حتى ما يتعدّى على النيابة العمومية...
ولمّا نائب ظهرت له روحو أنه "مُحترم" وما يحبّش المدوّنين يطيّحوا له قدره ويقولوا عليه "مُتحوّل" و"حِرْباوي" و"مِجْراب" و"انتهازي" ويقفز كـ"القرد" من حزب إلى حزب آخر... ويجي لا طاح لا دزوه يتّهم رئيس جمهوريته بالخيانة والتخابر؟ ويقول عليه ملالي ويأخذ دروسه من الخامنائي وأنّ رئيس الحكومة وزّع عليهم نصّ "بلاجيا" من كتاب الخميني هذا حسب نفس المنطق يتحكم عليه إعدام موش هكّة؟
كان عندكم الضوء ورّوه لعويناتكم... حرية التعبير وحقنا في أخذ الكلمة... لو كان تاقفوا على رؤوسكم وتشنقوا رواحكم في خصة باردو لن تنالوا منها....
سيّدي النائب "المُخبر" راهي الكلمة حقّ موش مزية...