كيف نمشي إلى الصندوق الاجتماعي بباردو أول حاجة نفكّر فيها "فطيرة بالعضمة" من عند الغمراسني…
البارح خذيت نومرو وبقيت نستنى في دوري... ونتفرّج على الحركات الدقيقة للمعلّم وهو يأخذ قطعة العجينة ويحلّها بصوابعه ويرميها في الطاجين بطريقة تُعطي للعجين شكل الفطيرة... هذا يحب ملاوي (فطيرة طرية) واللآخر يحبها ناضجة وأنا نحبها بالعضمة مروّبة... يبقى الصانع يدور فيها في الطاجين بعود طويل من الأليمنيوم ثمّ لمّا تستوي ويستقيم لونها يرميها أمام الصانع الثاني في كسكاس مُسطّح وهو بدوره يحطها في صحن أليمنيوم ويعطيها للحريف.
خذيت فطيرتي وانزويت بها في رُكن بعيد على رائحة الزيوت ... بديت باش نقصّ بطراطش صوابعي لكن الفطيرة سخونة... جاتني مرا قالت لي "عزيزتي موش هكّة تتاكل الفطيرة خوذي كاغط وارفسيها مليح مليح باش تبرد والكاغط يشرب الزيت ... هكّة هكّة هكّة (بزوز يدين وبكاغط رفستها قدّامي))....
حسيت أنها غاضتها الفطيرة كيف تعاملت معها بأسلوب لا يليق بصفتها فطيرة.... مشيت جبت كواغط من فوق الكونتوار وتلفّت نلقى الناس الكل "هكة هكة هكة في الفطيرة"... طول عمري نموت على الفطاير ونأكلها وعُمرري ما فهمت أنّ الفطيرة عندها طقوسها....
أحلى ما في تونسنا الفطيرة من عند الغمراسني والبنبلوني من سيدي بو سعيد وصحفة صُحلب من باب الأقواس وكأس رايب وكسكروت حلو من باب الخضراء وصحفة لبلابي بالهرقمة من باب سويقة ورأس مصلي من المطعم المقابل جامع الزيتونة المعمور وكعبة فريكاسي من القصبة ويويو الناوي في الباساج... وهندي تالة المقشّر إلّي يتباع في البراوط وكأس حلبة بارد ورأس بسباس…
عيش تونسي... وخلّيك من كرواسون ديكارلو وpain aux chocolats متاع الفلكانو... وp'tit dej في اللاّك وبيتزا "هوت" وساندويتش kfc ... واستهلك تونسي لأنك من غير ما تكون ذُقت فطيرة غمراسنية وكسكروت حمص بنزرتي ومطبقة قابسية وكفتاجي قروي ورفيسة كافية وبسيسة ساحلية وعبّود زمّيط صفاقسي صعيب باش تفهم آش معناها "تونس"…