خوذو الباكالوريا واعطونا الماء الصالح للشراب وشوية هواء "نقي"…

Photo

صفاقس أفضل نتائج الباكالوريا... صفاقس تُزوّد تونس بالمهندسين والأطباء ورجال الأعمال... صفاقس خزّان تونس من زيت الزيتون... صفاقس تُنتج البخّارة وتتحمّل النتونة والتلوّث متاع السياب…

صفاقس كسكسي دياري ودهن أسترال ومقاولات بو زقندة وشعبان وطيارات سيفاكس... صفاقس منصور معلّى ومنصف السلاّمي وصابر الرباعي والشهيد محمد الزواري... صفاقس CSS والسكك الحديد وأسامة الملولي وحمادي العقربي وعقيد الله يرحمه…

صفاقس التبارورة... وصفاقس كلية العلوم وكلية الحقوق وكلية المهندسين وكلية التصرف وكلية الطب والمستشفى الجامعي الحبيب بورقيبة.... صفاقس مصحّة البساتين ومصحة الزياتين ومصحة الرشيد ومصحة ابن النفيس... صفاقس مادام مصمودي... وGOURMANDISE …

صفاقس بابور قرقنة ونقل الحمامي والمطار والسكك الحديد... صفاقس معهد الهادي شاكر والناصرية و20 مارس والحي... صفاقس طريق الأفران وعين تركية والشيحية وتنيور ومنزل شاكر وحي البحري وحي النور وحي الحبيب والبدراني ونقطة.... والسياب والإمبيكا وبريتش غاز… صفاقس جبنيانة والحنشة ومنزل شاكر وعقارب والمحرص وبوجربوع وبو عكازين.

شفتوها هذه صفاقس؟

صفاقس الماء ديما مقصوص والناس تعيش على الري قطرة قطرة… باش تغسل الماعون يلزمك تعمل برنامج استراتيجي: الربع ساعة الأولى تنحّي اللّمعة ومن بعد تمشي تعمل دورة وتقضي شورك وترجع تلقى البانو تعبّى تعمل طلية وما تكثرش produit باش يسهال عليك التشليل وكان عندك طناجر خلّيهم للسبت الجاي… ومن غير ما تفكّر تغسل الشبابك ولا تسيّق الدروج ولا تبرّد الفيراندا…وردّ بالك تجبد الشاس…

وباش تدوّش يلزمك تقدّم مطلب وتستنى دورك… باش تتوضّأ يلزم تعبّي من الماجل وكان ما عندكش ماجل تيمّم… بالطبيعة ما تفكرش تخدّم الغسالة متاع الصابون في النهار، استنى الناس ترقد والحركة تخف باش débit يسمح باش تدور الماكينة…

الماء لمّا يتسيب ما تفهمش هل هو تاي أحمر وإلاّ شخاخ وإلا الله أعلم….

هذه صفاقس إلّي الناس حاسدينها على النسب المرتفعة للنجاح في الباكالوريا… خوذو الباكالوريا واعطونا الماء الصالح للشراب وشوية هواء "نقي"…

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات