الشباب اليوم كنس الشوارع وزينها... وغدوة يكنس بقية مؤسسات الدولة…

Photo

الشباب "تدوعش" عملوا طاولة وكراسي وجابوا الخبراء والمختصّين في الإرهاب والتطرّف والإسلام السياسي لتفكيك المشهد... و9 سنين والناس تتمعّش من تيمات (thèmes) "الإرهاب والشباب" ومن رحلات "الذهاب إياب لبؤر التوتّر" و"شكون سفّر الشباب؟" و"جهاد النكاح" و"الشباب السلفي بدوار هيشر" وتعملت أكثر من 3 دراسات ميدانية حطّوا فيها قد ميزانية وزارة الشباب والطفولة مرتين... و20 بلاتو والحبار للوذنين والناس تكتب وتحكي على "مظاهر التطرف لدى الشباب"....

الشباب فدّ وأيّس "حرق" وركب زوارق الموت عملوا منه دراسة حالة... وسموه بـ"المهمّش" و"المعطّل" و"الحرّاق" وحاكموه وحكموا عليه واستثمروا في والدين والديه باش يخدموا برامج استقصائية يعملوا بها "البوز".....

الشباب "دخل ببوشته" وشدّ القهاوي وركش يشرب في كابوسان وساعة ساعة يعمل شيشة يكرديها على حساب الجرناطة متاع أمّه... قالوا عزف عن ممارسة السياسة ونعتوه بالسلبية واللامبالاة وانعدام الحس الوطني وعملوا مؤتمرات وندوات باش يفسّروا أسباب العزوف…

الشباب أراد.... قالوا لا عاد هذه لخبطة وشخبطة... ولعب ذرّ. الشباب تكلّم ألوان... قالوا موش هكّة الحديث. هذا تخلويض وقلّة ذوق. اركحوا خلّي جماعة التراث والاستيتيقا والذوق السليم يحافظوا على روح "تونس" إلّي خنقتوها بألوانكم المشكشكة... إلّي ما تشبهش ألوان سيدي بو سعيد (الأزرق والأبيض(.

شنو هذا التقوعير... تونس فرشوا فيها "مرقوم" وحزّموها بفولارة خالتي مباركة. وطمسوا جمالها ببخنوق عيشة. شنو هذا oh la la

الشباب فتّق مواهبه... رفعوا الورقة الحمراء وقالوا "خارج الموضوع" ما تفاهمناش هكّة.... لم يجدوا concepts يحلّلوا بها المشهد... مراجعين درس "الإرهاب" و"شكون قتل شكري" و"الجهاز السري" و"الشعانبي" و"الشيخ حسّان"... طاح لهم "الشباب يريد ويبدع ما يريد"... موش محضرين الدرس هذا.

عملوا كيف إلّي جاهم امتحان الفلسفة على "العلم" جاوبوا على محور "السحر والشعوذة"... التيمات الجديدة موش داخلة في اجندات المانحين.... وخبراء الكوع والبوع ما ينجّموش يفسّروها.... عاودوا راجعوا... وسجّلوا في دورة تدارك.

الشباب اليوم كنس الشوارع وزينها... وغدوة يكنس بقية مؤسسات الدولة.

اخدموا وإلاّ "روّحوا قاع"....

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات