الدولة العالقة .... مطفية الضوء والشعب العالق ما على بالوش…

Photo

البارح نقدت استرخاء المواطنين وعودة الحياة إلى الشارع بشكل فوضوي... اليوم نحب نسأل عن سبب استرخاء الدولة وعلاش مطفية الضوء على حالة الإسترخاء الشعبي؟ ما هو السرّ خلف إصرارها على تقديم خطاب سياسي مطمئن عن الوضع الصحّي.

وكلام من قبيل "صفر خطأ طبّي" و"مسيطرين على الوضع" (كلّها سياسة). إن كان قررت أن تمشي في خيارات جديدة تعلمنا... وإن كامت اكتشفت معطيات جديدة تقول لنا…

أنا لمّا أقرأ المشهد نفهم أنّ الدولة مشات في خيار "الشعب يُريد" وأقنعت نفسها بأنّ الشعب يعرف آش يعمل...وخليه يكتسب مناعة ويواجه الكورونا.

وهي مهمتها تصدر مراسيم وقرارات لتحمي نفسها سياسيا من أي تداعيات صحية. وكان الأمور تعدّات على ستر تسجّل الإنتصار في حسابها السياسي. وكان الأمور لا قدر الله انتكست قيّد على الشعب المستهتر وغير المنضبط.

رئيس الحكومة طلع في التلفزة قال أن ابتداء من يوم 4 ماي سيقع رفع الحظر بشكل تدريجي (حظر موجّه) وقال أن وزارة الصحة ستقوم باختيار عينة من 10 آلاف مواطن وتجري لهم النحليل السريع....

وقال أنّ وضع الكمامة إجباري في المرحلة القادمة... (؟)نحن اليوم 28 أفريل والناس رفعت الحظر بشكل إرادي... وتدور في الشارع دون كمامات والمغازات مليانة والسلطات مطفية الضوء. سيارات تتجوّل دون تراخيص... ومحلات مفتوحة دون إذن. عدد كبير من المؤسسات الخاصة رجعت تخدم....

ناس تصلّي في التراويح خلسة... وناس تلعب في النوفي خلسة. وناس تدرّب وتعمل في الرياضة الجماعية جهار في النهار... الوافدين من جربة في مدنين يحوّسوا في السوق... كان الدولة قررت تمشي في الخيار الألماني بالنسبة للموجة الثانية تقول لنا... وتصارحنا بذلك ...حتى نكون en connaissance de causes

سيّبوه محمد عبو.... مجرّد فاصل في جملة اعتراضية. الفساد لا يُحارب بوزارة وإنما بمقاربة كاملة وشاملة.

غريبة الإعلام سكّر موضوع الكورونا نهائيا ... لا ومضات اشهارية ولا بلاتوهات ولا بلاغات .... حتى الكرونيكورات الكتف للكتف تقول في صلاة التراويح.... مريم بن مامي بينها وبين فوزي بن قمرة عشرين سنتمتر. وعلى يمينها مجدي كيف يتكلّم بزاقه يتناطر على وجهها.... بعلول ولبنى يتكلمو في وذن بعضهم....

لا كمامات ولا يحزنون. نفس الشيء في التاسعة.... قاعدين في حجر بعضهم... اعلام يخدم بالكوموند.... مأجور. فاقوا أن الحظر ما يخدمهمش.... والتباعد فيه تهديد لنمط عيشهم ومورد رزقهم: سهريات ومسرح وسينما ومسلسلات ومهرجانات وسفر للخارج... وبواتات ونزل وسهرات خاصة. واعراس وطهورات ....

يعيشوا في الحضب والحجر (الحاء مكسورة والجيم ساكنة) الدولة العالقة .... مطفية الضوء. والشعب العالق ما على بالوش... ولاهي يحلل في كلب الذيب.

اقولها للتاريخ.... هناك شيء غريب يحدث. الائتلاف الحكومي يتحمل المسؤولية كاملة... واللعب موش بأولادنا... أي قرار فيه تهديد لصحة المواطنين.... يتحمل مسؤوليته عبد اللطيف المكي... السارح المشوم يكمل سرحته... فما بالك بالجنرال. يكمل الحرب لآخر رمق…

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات