بارشا مسلمين في العالم يحيوا هالنهارين ذكرى مقتل شخصية تاريخية اسمها الحسين بن علي.. أنا الحقيقة نسمع بيه من بعيد لبعيد كيف الناس الكل.. أما ما لقيتش لا فضوة ولا سبب باش نحاول نتعرّف عليه أكثر. نعرف طراطش معلومات عامة عليه من قبيل أنو أمو فاطمة بنت الرسول وبوه علي ابن أبي طالب صديق الرسول وولد عمو. ونعرف اللي هو مات مقتول في معركة بينو وبين يزيد ولد معاوية.. واللي معاوية بيدو كان متعارك مع علي على حكاية شكون أولى بالحكم.
تي حاصيلو بعبوكة السلطة والحكم اللي عرفتها المجتمعات الكل وماهيش باش توفى إلى أبد الآبدين إلا إذا اكتشفت البشرية طريقة يعيش بيها كل إنسان وحدو كي كلب وما يستحقش لحتى كازي من بني جنسه ولا من أجناس أخرى.
لا علينا من هذا.. المهم آش راحلي انا تو في عركة حسين ويزيد ومعاوية وعلي وعبد الصمد؟
برا سيدي نفترضوا واحد منهم ظالم والثاني مظلوم.. اي كيفاش باش نفصل بيناتهم انا؟ تي يجعلنيش نلقى جهد باش نفصل في العرك اللي مندلع يوميا بين فروخي خلي باش نفهم الظالم والمظلوم في عركة عندها 1384 عام…
لا والمصيبة فمة جماعة قالك لازمني نحب علي وولدو الحسين وسلالتهم الكل.. تو بربي هذا حديث ؟ معناها أنا عندي طرانط فائضة متاع حب باش نوزعها على كائنات تاريخية ممكن ياسر تطلع من إبداعات خيال خصب مسكون بعقدة مظلومية وقهر وطهورية زائفة.
الحقيقة متاع ربي جات في ماكلة شقالة كسكسي بالمناسبة يخلف ربي.. أما باش ندخل في عركة متاع ناس ما نعرفهمش بصراحة منجمش.
تي يجعلنيش نفضّ عركتي مع روحي بربي.