قداكشم مبدئيين

بربي الناس اللي حالّين منوحة على ضعف حكومة المشيشي وعجزها عن تطبيق قرار الحجر الشامل.. نحب نقوللكم راكم فعلا طز حكمة.. قال شنوة قالك حكومة المشيشي عجزت بش تطبق القانون والناس تمردت عليها وطفتها وحقرتها وبالتالي لازم الحكومة ترحل…

ياخي ما شفتوش المواجهات العنيفة في شوارع ألمانيا وهولندا بين قوات الأمن والرافضين لقرار الحجر الشامل ومنع الناس من العمل؟ تي ماهو نسّبوا شوية مالجعبنة متاعكم ازح.. قولوا اللي الوباء ظرف استثنائي يتحدى كل حكومات العالم بما فيها حكومات الديمقراطيات المزدهرة والمستقرة.. فما بالك بشبه ديمقراطية تعاني في مرضى نفسيين كيفكم... وتتصرف في ميزانية مقشقشة...

والا قولوا بالفلاڤي يا مشيشي اقصف المخالفين بالأسلحة الثقيلة.. والا حطّ قناصة في الشوارع واللي يحل باب دارو يتيروا عليه.. بش نلقوا ذريعة نحاكموك بيها.. تي ماكم قلبتوا الدنيا كي الأمن وقف الشباب اللي تظاهروا ليلا في الأحياء الشعبية.. وقلتولوا خلي الشباب المقهور يتنفس وينتقم من لوبيات اقتصاد الريع (اش كرهتوني في هالكلمة.. وين تعرضني تجيني تزيليفة) ...؟!! قداكشم مبدئيين ازح...

المشيشي تائه وحائر وماسط وكعبة لا فعلا.. لكنو آخر حلقات المسخرة اللي عايشينها.. كيفاش تحبوا الشعب يحترم الحجر وهو يشوف في رئيس الدولة ماهوش معترف أصلا بالحكومة ويحرض على رئيسها في أجهزة الأمن؟ تي باهي كي ما زلنا لاقيين الماء والضو والخبز في الكوشة…

اه تحبوا تقولوا المشيشي ما نجمش روحو يخليها لواحد قوي وينجم؟ شكون يضمنلي أنا شخصيا ما تجيبوش سامية عبو رئيسة حكومة.. والا هيكل المكي مثلا...

عاد ماهو وقتها لازمنا نصرفوا الميزانية الكل في استيراد خمسة ملاين ڤرداش... تعرفوه الڤرداش ماهو؟ هو في الأصل يصلح لتڤرديش الصوف.. أما باعتبار صناعة النسيج تمكننت في كل مراحلها.. نولوا نندبوا بيه وجوهنا بالتناوب…

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات