سي ابراهيم في كل تصريح يحب يلعب فيها حافظ أسرار القصر.. ويجري من تلفزة لتلفزة باش يعلن عن قرب انطلاق الحوار الوطني.. مرة يقول في الأيام القريبة القادمة ومرة يقول في الساعات القادمة.. زعمة زعمة يحبّ يحسسنا اللي هو صاحب حظوة عند سعيد…
آخر مرة زاد شوية في الدوزة متاع البلّوط (لا علاقة بشجرة البلّوط طبعا) وأعلن بكل ثقة اللي الحوار باش يكون بمشاركة المنظمات الوطنية الأربعة.. ومنها طبعا اتحاد الشغل…
يعمل هكّا عمك الطبوبي ويعطيهالو لا تقرا لا تكتب ويقلو لا الاتحاد لن يشارك في حوار مخرجات معلومة مسبقا.. بلغة أخرى راك كذاب وسفيه.. وحدّك غادي...
باهي توا يا ابراهيم؟.. باش تشريها هالبخسة ترا قلي..؟
نعرف اللي أنت قاعد تمارس في تدريبات شاقة في رياضة الرخص منذ أشهر.. أما بصراحة هذي تهنتيلة لازمها تحضيرات أقوى شوية... اللهم كونش تستعير رصيد الرخص متاع زميليك ليلى وهيكل..
وقتها عاد تهنتيلة كيف هذي تولي تحسها شهادة تكريم وتميّز في الرخص.
مسؤولية فشل المظاهرات المساندة لسعيّد أول أمس
مسؤولية فشل المظاهرات المساندة لسعيّد أول أمس أحمّلها رأسا ومباشرة وبالتمام والكمال لهيكل المكي… خذلان الرئيس وضعف التعبئة والتحشيد وتفضيل الجماهير لمقابلة كرة قدم تافهة على الزحف نحو العاصمة لبناء الجمهورية الأممية القذافية الجديدة.. كل هذا سببه هيكل المكي شخصيا.
وهاهو علاش :
توّا يا رسول الله الأخت ليلى حداد مقطّعة روحها في الشارع الرئيسي.. ومسيّبة خدمتها ومصالحها.. وخاصة مسيبة دروس التدارك متاع برنامج الثالثة ابتدائي في اللغة العربية .. وخارجة تهتف للجمهورية القاعدية الأفقية وتوزّع في ابتسامات الفرح على أطفال المظاهرة.. وسي هيكل صابح يضرب في النوم وما يهبطش يتظاهر ..!
كان هذا موش خذلان وخيانة وتواطؤ مع أعداء الرئيس.. مالا آش نسمّوه.. ؟! معناها هيكل اللي تحدّى العالم وعفس على كل الاعتبارات الاجتماعية المتخلفة وأعلن حبّه الجمّ للرئيس.. يصبح راقد.. وتحبّوا المظاهرات تنجح..!
بالكش تحبّوني انا نخرج نتظاهر مثلا.. ؟ بصراحة أنا مع محاسبة هيكل وحتى معاقبته..
كعقوبة حشدية قاعدية أقترح أن يتم إلزامه بالتظاهر وحده ليلا نهارا لمدة شهر أمام المسرح حاملا شعار حركة الشعب لمدة شهر..
وباش ما يقلقش ينجم يسمع على تلفينو أغنية أم كلثوم "الحب كلو".. وإلا "حكم علينا الهوى"…