احنا شعب عندو مشكلة. نحبو ونكرهو، لكن عندنا مشكلة في التعبير عالحب، أما الكره نعبرو عليه بسهولة، وكيف نكرهو، نحبو الناس الكل تعرف أنا نكرهو. شنوة نكرهو؟ نكرهو السارق لكن نكرهو الناجح زادة. نكرهو إلي يظلمنا، لكن نكرهو إلي يقوللنا حقيقتنا. إلي يسرقنا، واحنا نبداو نكرهو فيه، نقولو في قلوبنا إلي هو نجم يدبر راسو، وماناش متأكدين أنا نعملو حاجة مختلفة لو جاتنا الفرصة.
نكرهو إلي يظلمنا، لكن كره متاع خوف، موش كره احتقار. نكرهوه، لكن في قرارة أنفسنا نقولو صحة ليه، عندو سلطة باش ينجم يظلم. وبكلنا تمنينا في لحظة أن تكون عندنا السلطة هذيكة، وماناش متأكدين أنا باش نشدو رواحنا على الظلم لو كان جات عندنا سلطة. أصلا احنا علاه نتمناو تكون عندنا سلطة،؟ماهو باش انجمو نظلمو، ساعات.
نكرهو إلي يقوللنا حقيقتنا، إلي يحرك السكين في جرحنا. إلي يشككنا في أننا شعب عظيم، ومنفتح، وسمح، ومثقف، وسميع في مهرجان قرطاج الدولي. نكرهو إلي يقوللنا راهو ساعات نعملو اختيارات خاطئة، خاطر في بالنا ما نغلطوش. نكرهو إلي يحملنا مسؤولية أفعالنا واختياراتنا، خاطر ما نحبوش نتحملو المسؤولية. كيف يجي حد يقوللنا راهو مآسينا بسبب شرذمة ضالة، نفرحو، ونعملو رواحنا نصدقو، خاطر العكس يزعجنا.
الناجح؟ ما نحبوشي. خاطر النجاح حاجة متعبة، واحنا نحبو التحليق والتنبير علي يخدمو. "تقرى وإلا ما تقراش المستقبل ما ثماش". كيف حد يقرى ويلقى مستقبل، نعتبروه مجرد استثناء، ونقولولو "محسوب " !
نحبو إلي يكذب علينا، رغم نبداو عارفينو يكذب. أما كذبو حلو، خاطر إلي يقول الصدق ما ننتظرو منو كان التعب. "نقولو للكلب يا سيدي"، وماذابينا "نمشيو الحيط الحيط"، وكيف نلقاو كيفاه نزرفو، نزرفو. "الدنيا تدبير راس"...
نعتقدو أن إفريقيا هوما سود البشرة، ومنتخباتنا الرياضية تمشي ساعة ساعة تلعب في أدغالها، ويخسروا خاطر ديما يسحروهم…
نعتقدو أنا موجودين شمال الصحراء بذراعنا، وينجم البعض منا يتمنى زلزال يزيد يقربنا شبرين لأوروبا. الخريطة غالطة. يفترض رانا بحذا السويد والدنمارك، ديجا ثمة شوية شبه. الشبه ما يغلطش كيف الخرائط.
مسلمين أما نحقرو الضعيف. شعب الله المختار، أما ماعناش زهر. أبهرنا العالم، أما قادرين نبهرو رواحنا كل يوم أكثر. نخسرو، أما ديمة نربحو رهان التنظيم.
عادي، يصير في أحسن الشعوب... المفيد نتحسنو. هانا بدينا نخرجو في "الوصفان"، دريجين ونتحسنو !