نشوف في ناس كانت مقربة من الجرندي، ونعرف أنو حرص على التغطية على برشة مشاكل عملوها أثناء قيامهم بمهام رسمية في سنوات خلت، بل كان حريص على تسميتهم في سفارات هامة، نشوف فيهم اليوم فرحانين بإقالتو.
مش باش نحكي على الجرندي برغم انجم نحكي برشة حاجات، لاهو وقتو، ولا قادر أني نشارك في حفلة التشفي. أمر لا يعنيني حقيقة. لكن نحب نحكي على اللؤم متاع بعض رفاق درب الجرندي، إلي اليوم شامتين في إقالتو.
بطبيعة الحال اللئيم عمرو ما يقلك أنو لئيم، وديمة يحاول يغطي على اللؤم متاعو باعتبارات أكبر من شخصو. وقت يقدم في تعبيرو عن الغبطة لإقالة أي مسؤول الاعتبارات الوطنية معناها اللؤم متاعو ماعندوش حدود، وما ياقف قدامو شي من أخلاق أو شهامة.
هذا واحد من الدروس الأبدية وإلي لا تنتهي لكل من هو في السلطة: مادايمة لحد، وفي نهاية الأمر، إذا ربحت كل شي وخسرت نفسك، فإنك ما ربحت شي. حتى شي على الإطلاق.
مادايمة لحد فعلا: قداه يمكن تبقى في الموقع إلي وصلتو بتعفيس الناس، وبالتلحيس، وبقلة المعروف؟ عام، اثنين، عشرة؟ حتى شي. تبقى في الموقع عام، تتنسى في جمعة برك ! تبقى عامين؟ تتنسى في جمعة برك !
وتوة au suivant ….