كان باش تكملوا هكة في لغة التعالي والانتصارية اللي تتفّهو بيها كل ما قام ويقوم به غيركم عبر تاريخ تونس المعاصر وتواصلو حتى في شتمهم جميعا بلغة عدمية تقريبا بحيث يصبح 'التأسيس الجديد' عندكم يلزمو "طابل راز" لكل شيء و بحيث يصبح 'البناء الجديد' كأنو " فسخ كل شيء ونبداو من الصفر" كيف ما تحبو انتم فحسب نقوللكم من توة حضروا رواحكم باش يتحالفوا ضدّكم الناس الكل من أقصى اليمين الى أقصى اليسار خاصة لو تنكرتو لمسألة حرية الأحزاب و المنظمات والجمعيات .
كان 'البناء الجديد ' باش يكون هو بيدو عقائدي ومتسلّط ويتصور في روحو عاود صنع العجلة متاع التاريخ من جديد لأنو يعتبر روحو 'الوحيد الصحيح' راهي الناس الكل باش تقلكم السماح : تعددية فكرية وسياسية وتنظيمية تعترف انها ناقصة خير من أحادية جديدة تتوهم انها وحدها الصحيحة وتكلم في الناس الكل بمنطق 'عشرة وافي' وما تقبلش لا نقد الخصوم ولا نصيحة الأصدقاء تقول عليها 'علم لدني تاريخي' باش يحول تونس لجنة أرضية يعوض العلم اللدني الالهي متاع الجنة السماوية.
هذي مجرّد نصيحة سياسية أرضية من صديق كان قبلتوها. و بجاه ربّي ما تجهّلوناش و تضحّكو علينا 'الأغراب' رانا اصحاب . شوية تواضع يهديكم .باهي !