الموجز المريحْ في خلاصة تاريخ تونس من خلال التزغريط والشطيحْ

1-الباي انقلب عليه بورقيبة... هبط جزء من الشعب يشطح ويزغرط ويقول غمّة وتعدّات…

2-بورقيبة انقلب عليه بن علي... هبط جزء من الشعب (عادة هوما بيدهم) يشطح ويزغرط ويقول غُمّة وتعدّات…

3-بن علي ثار عليه الشعب وفشلت محاولة الانقلاب عليه (إلى حين) وهبط الشعب بكلّو المرّة هاذي بما فيهم الجزء الّي ديما يهبط يشطح ويزغرط ويقول غمّة وتعدّات…

4-طاحت الترويكا في 2014... هبط آك الجزء هو بيدو يشطح ويزغرط ويقول غمّة وتعدّات…

5-السبسي في آخر أياماتو انقلبوا عليه جماعتو بما فيهم ولدو... وهزّ ربي أمانتو... وربح قيس سعيد الانتخابات وهبط من الشعب آك الجزء إلّي فرح بالثورة يشطح ويزغرط ويقول غُمّة وتعدّات... طبعا موش الجزء الآخر الّي مستانس يهبط بعد كلّ انقلاب يشطح ويزغرط ويقول غمّة وتعدّات... وقتها الجزء هاذايا لاهي يشطح ويزغرط ويقول "هانابيل... نحنا معاك هانابيل"…

6- في 2021 عمل قيس سعيد انقلاب على الدستور إلّي جابو للحكم ودار على البرلمان إلّي أغلبيّة أعضاؤو صوّتولو (في ماعدى جماعة عبير وجماعة نبيل)، وعلى الحكومة إلّي هو جاب رئيسها... في الأثناء تخلّط الشعب وتمشكى... وهبط جزء من الشعب يشطح ويزغرط ويقول غمّة وتعدّات... فيهم جماعة "ياسيّد الاسياد يا حبيبي بورقيبة الغالي" وفيهم جماعة "الله أحد الله أحد وبن علي ما كيفو حدّ" وفيهم جماعة "غلّطونا" وفيهم حتّى جزء من جماعة "محلا الثورة التونسية تضمّ الجميع" (ركّزولي على تضمّ الجميع)، وفيهم جماعة "هانابيل" وفيهم إلّي راكبة على بسكلات والّي طالع فوق برميل، و"حراير تونس" الّي في كلّ محضر يحضروا... هبطوا الكلّهم يشطحوا ويزغرطوا ويقولوا غمّة وتعدّات...

أهوكا عاد من جملتها وحدة من "حراير تونس"، زغرطت وحلفت بيمين إلاّ ما توشّم اسم قيس على "الترمين" لوكان يبيّت الجماعة الّي يكانوا يغنّيوا في "طلع البدر علينا" في الحبس مَرميّين…

#أبو_المقعار

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات