الماء في تونس و منسوب السدود، شنوة الوضعية و شوية أرقام

مش نحكي كان على الماء الصالح للشراب، تونس عندها شبكة مياه الشمال اللي تربط سدود الشمال بتونس العاصمة و الوطن القبلي، الساحل و صفاقس. هذه الشبكة صممت و أنجزت عندها عقود و الإستثمار فيها تراجع نسبيا من التسعينات حتى الآن. مش نحاول نعطي بعض التفاصيل على هذا المكتسب الهام لتونس و اللي هو من أكثر الحاجات اللي يخلو تونس كبلاد يقع فيها توزيع ثروة هامة وهي الماء من أقصى شمال البلاد للمناطق الأخرى اللي عندها أقل ماء، هذا التحويل للثروة مش يجي يوم و يقولو الناس اللي هو موش عادل و اللي ماء mispriced عالآخر مقارنة بال"سلع" الأخرى، بسلع أعني المصطلح الأنقليزي commodities. إستثمار تونس في السدود و شبكة تحويل المياه هو إستثمار مربح برشة و مثال متاع قروض ناخذوها من الخارج و تنفع برشة التوانسة.

خلي نبدو بالأرقام الرئيسية، الصوناد توزع في 800 مليون متر مكعب في السنة، يعني كل تونسي يستهلك في 185 لتر في اليوم تقريبا، هذا بالطبيعة ما يدخلش فيه إستهلاك الفلاحة لكن يدخل فيه إستهلاك السياح و الخدمات و الصناعة اللي تزودها الصوناد بالماء. على ال 800 مليون متر مكعب سنويا، النصف يجي من سدود الشمال أي 1.1 ملون متر مكعب في اليوم كمعدل، الباقي من آبار أي مياه غير سطحية جاية من الموائد المائية تحت الأرض. لا يوجد أرقام واضحة قداش الفلاحة في الوطن القبلي أو الساحل أو في أحواز تونس تستهلك سنويا من مياه سدود الشمال لكن ربما 400 مليون متر مكعب خاصة في الأشهر بين ماي و سبتمبر. طاقة إستيعاب سدود الشمال هي 1800 مليون متر مكعب موش الكل طبعا مربوطة بمنظومة و شبكة مياه الشمال.

الشبكة هذه فيها برشة فروع و تجيب الماء من برشة سدود، إنجمو نقسموها إلى ثلاث فروع رئيسة لكن في الحقيقة الأهم هم الزوز فروع الأولى:

(1) أكبرها الشبكة اللي محورها سد سيدي سالم على مجردة لكن سد سيدي سالم مربوط بسد ملاق اللي ينجم يعدي الماء لسيدي سالم عبر وادي ملاق و مجردة دون ضخ و سدي بربرة اللي مزود بمحطة ضخ مياه لسد بوهرتمة و من سد بوهرتمة يتعدى الماء لسد سيدي سالم، يعني في الحقيقة كي نحكو على سد سيدي سالم هي شبكة فيها سدود بربرة، بوهرتمة و ملاق، هذه الشبكة لا تستلزم كثير من الطاقة لضخ الماء ماعدى بين سد بربرة و بوهرتمة، يسيبو الماء من سد لسد عبر واد ومن بعد من سد سيدي سالم يمشي الماء في واد مجردة حتى سد العروسية على واد مجردة قريب من طبربة ومنه للقنال اللي تعرفوها الكل فوق الأرض و اللي تتعدى بعدد مدن ضواحي تونس كبجاوة، فوشانة، مرناق، ربما برشة مايعرفوش اللي القنال تشق جبل بوقرنين في بومهل و يخرج الماء من حمام الأنف (الماء يتعدى في وسط الجبل) من الجانب الآخر لجبل بوقرنين حتى محطات الضخ بفندق الجديد و بلي و منها تكون تحت الأرض حتى صفاقس.

هذا الفرع زود 200 مليون متر مكعب في 2022 للصوناد من غير ما نحسب إستهلاك الفلاحة، الشبكة هذه مهمة في الصيف للفلاحة زادة في الوطن القبلي و الساحل، كلفة الضخ فيها مش كبيرة، يعني هي العمود الفقري أو المحرك لمنظومة الماء في تونس، المشكل الكبير السنة هو في المحرك، سد سيدي سالم فيه كان 90 مليون متر مكعب و نظريا ما يلزموش يهبط تحت 80 مليون متر مكعب لضمان أمان السد و structure متاعه، يعني عندنا 10 مليون متر مكعب في سد سيدي سالم (مستوى حرج جدا، الأضعف منذ إنشاء السد)، نزيد عليهم 12 مليون في سد ملاق، يمكن تحويلها، 40 مليون في سد بربرة و 5 ملاين في سد بوهرتمة، يعني تقريبا 70 مليون متر مكعب على 200 مليون يلزمنا للماء الصالح للشراب، يعني أربعة أشهر كمعدل إستهلاك ماء صوناد فقط و ما يعدوش الصيف، يلزم يجو 150 مليون متر مكعب إيرادات قبل الصيف السنة وهذا ممكن إذا جاو مطرتين باهين متاع 50مم و أكثر في المطرة عامة على كل الشمال الغربي و شرق الجزائر اللي قريب لتونس، في الحقيقة يلزم 200 مليون إيرادات باش نعطو شوية ماء الفلاحة و خاصة الأشجار باش نستحفظو على المكسب هذا. هذه الشبكة مخزونها الحالي ضعيف برشة و يلزم تصب المطر بكمية باهية باش ما ينقصش تزود الماء.

(2) ثم شبكة سيدي البراق، سجنان، الزياتين، جومين، المالح في شمال باجة و بنزت، هذه الشبكة صممت في الأول كإحطياطي إستراتيجي و خاصة سد سيدي البراق، وتستعمل الضخ برشة خاطر سد البراق موجود في مستوى البحر تقريبا و يقع ضخ الماء من سد سيدي البراق و هذا يستهلك الكهرباء و يمشي الماء إلى واد سجنان و منه إلى سد سجنان، يقع ضخ أيضا الماء من سد الزياتين إلى سجنان، و فمة سدود أخرى أقصى شمال بنزرت كيف قمقوم و الحركة تنجم تضخ الماء إلى سد سجنان لكن السدين الجدد هاذم جاهزين لكن لا يقع الضخ منهما لا أعرف السبب الحقيقة.

من سد سجنان اللي هو محور الشبكة هذه اللي أهم سد فيها هو سد سيدي البراق، يتحول الماء عبر أنابيب تحت الأرض من سجنان، جومين و المالح إلى تونس العاصمة و منه يقع الربط في إتجاه الوطن القبلي و صفاقس، الشبكة هذه جودة الماء متاعه خير (ملوحة)، أكثر كلفة بسبب الضخ خاطر الماء يجي من سدود موش مرتفعة و قريبة للبحر، و موجهة أساسا للماء الصالح للشراب، هي إحطياطي زادة خاطر حتى في سنوات الجفاف معدل الأمطار في أقصى الشمال يكون خير بياسر من بقية المناطق، سد سيدي البراق ملي تعمل ديما يتملى في الخريف و ديما يفرغ في البحر، كان هذه السنة اللي حاليا نسبة التعبئة فيه كان 50% كيفو كيف سد سجنان، و بيقية السدود الأخرى الأصغر مستواها متدني، الشبكة هذه عندها débit maximum خاطر أنبوب و عندك طاقة ضخ قصوى، حاليا 0.8 مليون متر مكعب في اليوم يعني أقل من 300 مليون متر مكعب في السنة و متنجمش وحدها تكفي باش الناس الكل في تونس العاصمة، الساحل، الوطن القبلي و صفاقس تحل السبالة يجيها الماء 24/24.

عام 2022 إستهلك التوانسة 200 مليون متر مكعب من الشبكة هذه، يعني تونسي في صفاقس يجيه الماء من سيدي البراق في نفزة من مطر و عيون ماء في جبال خمير، وهذا عنده كلفة متاع إستثمار و ضخ وكهرباء. هذه الشبكة الإحطياطي حاليا مافيهاش 200 مليون متر مكعب متاع عام كامل و قاعدين نستهلكو في الإحطياطي الإستراتيجي المكلف خاطر سيدي سالم فارغ كيف حكيت في النقطة واحد لكن إنشالله تصب المطر في الثلاث الأشهر القادمة و يرجع مستوى سيدي البراق إلى 200 مليون متر مكعب إنجمو نستعملوهم، أما كيف قلت سيدي البراق وحده ما يكفيش!

(3) موش مش نطول في النقطة هذه، الشبكة الثالثة هي الأقدم و الأصغر وهما سدي بني مطير أقدم سد في تونس و سد كساب في جندوبة و باجة و يحول الماء الصالح للشراب بأنابيب تحت الأرض لغدير القلة قريب من تونس بمعدل 50 مليون متر مكعب في السنة و هذين السدين لهما مخزون متدني حاليا (أقل من 20% )و لا يمكن التعويل عليهم إذا إستمرت حالة الجفاف الحالية.

الخلاصة، يلزم مطرات باهين باش يقع سيلان الماء في واد مجردة أي في الكاف، جندوبة، باجة، سليانة و سوق أهراس في الجزائر باش المدن الكبرى يبدأ عندها ماء صالح للشراب في الصيف 24/24، بالنسبة للفلاحة اللي يزرعو خضر و غلال يتزود من منظومة مياه الشمال مش يكون عليهم صيف صعيب لا قدر الله. يلزم 400 مليون متر مكعب للصوناد و فما حاليا 240 مليون على أقصى تقدير يعني فمة سيناريو حقيقي بدون ماء هذا الصيف 24/24، بالنسبة للفلاحة حتى كان صبت المطر في فيفري و مارس مش يكون تقريبا موش كافي.

سامحوني طولت شوية لكن الموضوع مهم ولم أرى أي توعية حتى الآن و حتى إجراءات فعلية. هو تلخيص شخصي قمت به بعد دراسة أرقام متاحة للعموم باش نعمل فكرة وحدي هل الوضع حرج أو لا و نخليكم تحكمو وحدكم حسب هذه الأرقام.

ربي يرحمنا! و شد حاجة وحدة، الماء سومو أرخص برشة من السوم اللي يخلينا نستهلكو الثروة هذه بطريقة مستدامة و "جعلنا من الماء كل شيئ حي"، صدق الله العظيم.

الصورة الأولى فيها وضعية السدود في تونس مقارنة بالسنة الفارطة و المخزون في كل سد،


…

أما الصورة الثانية فهي رسمي تبسيطي للشبكة اللي حاولت باش نفسر كيفاش تخدم.


…

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات