مستشفى جربة ومستشفى مدنين يتخاصمان حول مواطنة تونسية مريضة بالكورونا يتطور هذا الخصام ليخرج ما بداخل البعض منا التعصّب للإنتماء الجهوي والقبلي والعروشي المقيت.
الى الذين يشتغلون في المراكز الصحية والمستشفيات والى كل المسؤولين في القطاع الصحي: التونسي في بلادو ومن الواجب إسعافه والعناية به في اي مكان على أرض الوطن.. بنزرتي يتداوى في مدنين ومدنيني يسعف في نابل.
ثم كل واحد يعرف قدرو: اي واحد يخدم في مستشفى المستشفى ماهوش متاع السيد الوالد وما جاش في بايو في الميراث!!!
شنية ها العقلية المتخلفة؟
الكورونا خلاتنا نكتشفو الي التونسي يظن أن جبانة قريتو متاعو ومكتوبة باسمو في دفتر خانة.. والمستشفى الي في الولاية الي يعيش فيها متاعو ووارثو على السيد الوالد ومسجلو في دفتر خانة.. اش قولكم هيا نقسمو البلاد وكل واحد يبني سور ويسكر على روحو.
الغريب في الأمر أن نفس التونسي الي عندو هالجهوية المقيتة يحكي على الجمهورية والدولة والحداثة. مستحيل نبنيوو بلاد و احنا نتصرف بعصبية مقابلات كرة القدم.
هذا وطن يا ناس.. وطن جريح ولا إمكانيات له!!! إذا احنا نعملو هكة في بعضنا.. ما نلوموش كيف الغريب يردسنا تحت الصباط .