لقيت سِكُونس في النت فيها لُطفي لعماري، في بلاطو في قناة "9" يقول اللّي "حسن حنفي، كتبْ كتابْ يمجّد فيه مقتل الرئيس المصري الراحل أنور السّادات"، ولا المُنشطة متاع البرنامج ولا الحاظرين ما وقّفوه ولا سِئْلُو على المراجع متاعو.
حلّيت الجوجل وقعدت الّوّج على الكاتب هذا، ولقيت اللّي حسن حنفي استاذ جامعي، اختصاصو الفلسفة وعندو العديد من المؤلفات الاكاديمية، ومن منظّري ما سُمّي في الثمانينات "باليسار الاسلامي" اللي يدعو الى التحرر من الفكر التقليدي ويفتح مجالات أكثر للاجتهاد في الدين.
وكتبْ كتُبْ يعالج فيها الاصالة والمعاصرة والحداثة. وزيد قعدتْ الّلوّج على المواقف متاعو تجاه مقتل السادات، وما لقيت حتى شيء. بل بالعكس كان منتقدا حادّا للجماعات المتطرفة اثر مقتل السادات.
يعني، واحد يبدا غافل، يشد في الذاكرة متاعو اللّي "الفكر متاع حسن حنفي ارهابي". وزيد تفكّرت السلسلة متاع التواريخ اللي حكى عليها سفيان بن فرحات على تاريخ تونس واللي شطر المعلومات اللي قالها مالقيتش فيها مراجع صحيحة، وبالرغم من ذلك أبهرت المنشطة اللي في البلاطو.
سبق وقُلت اللي امثال الكرونيكار هذا، تعلّموا وقتاش يزلّقوا أفكار متاع جهل والتهبيط من مستوى النقاش والتسطيح والتطاول على مواضيع بعيدة على اختصاصهم، اذا عندهم اختصاص وحيد.