لحظة،

-كيف يستدعى صحافي واحد كيما المغزاوي واللا الرحوي واللا عبو واللا الحمامي واللا غيرهم (مع احترامي للاشخاص في ذواتهم) واللا اللي يشبهولهم وسالوا على تطورات الوضع الراهن في البلاد. الصحافي هذا والقناة كلها والخط التحريري والمخرج والمعد، علاش معمّلين؟

يستنّاوا منّو،

(1) تحليل موضوعي وعميق للوضع؟ لا بالطبع، لانو الضيف موش مؤهّل ولاهو مختص بعلم الاجتماع ولا بعلم الاقتصاد ولا بعلم التاريخ ولا بعلم الاجتماع السياسي. الاّ اذا كان الهدف هو فسح المجال الاعلامي لانتقاد الخصوم، ولكن الاكثر من ذلك بش يكرّهوا الناس في حاجة اسمها نخبة سياسية واللاّ ثقافية.

(2) افكار جديدة بش ترفّع من منسوب الوعي عند المواطن؟ لا بالطبيعة، لانو قبل ما يتكلم عبو معروف شنوة بش يقول مهما كان السؤال. بش يقول اللي هو ما كانش يتصور بش قيس سعيد يمشي في الفصل (80) بالطريقة هاذيكا واللي هو كان وزير واللي عندو ملفات ضد النهضة.

وانا شخصيا نشك في مستواه العلمي بالرغم انو ولى دكتور "juste" بعد ما استقال مالترويكا. نشك في مستواه العلمي على خاطر من البديهي انو بلاش محكمة دستورية الفصل (80) يمكن للرئيس بش يفهمو ويفصلو كيما يحب.

الحمامي ما نحكيش عليه على خاطرو فارغ ونْغَرْ كيف ما واللاش وزير فاشل مرة اخرى، والروحي بالطبيعة، من اليسار المهمش، لاهو اكاديمي ولاهو سياسي يساري مرموق وما نتصورش حتى انو قاري ماركس وفاهمو، بش يقول كيما المغزاوي اللي ما يمّنش بالدولة الوطنية على خاطر "تونس تتسمّى اقليم" في الوطن العربي اللي يحتاج الى زعيم كيما عبد الناصر واللاّ بشار، واللي الاعتقالات "ميش سياسية".

(3) بش ياخذو فكرة عامة على مواقف الاحزاب في البلاد؟ يمكن، لكن مواقف هاذوما معروفة من الثمانينات ولم تتغيّر قيد انملة.