يوسف الشاهد :اقوال ضعيفة ياسر…

في الحديث عن منظومة الدعم للمواد الغدائية، يقول يوسف الشاهد في التلفزة اللي هو ما حبّش يصلحها، ويزيد يقول الاتي :

" تعَمْلِتْ (distorsion) عندها اربعين سنا، خليها تقعد على خاطر المربوح في الميزانية من رفع الدعم على المواد الغذائية باش يكون شوية وما يعمل شيء وزيد التحويلات المباشرة موش باش تكون مهمة".

لا شاف الريع اللي استغنات منو فئات معينة عندها اربعين سنا واللي واللات توّه مجمعات كبيرة استفادت منذ السبعينات من دعم الفرينة باش صنعت بيها حلويات وتبعات بأسعار السوق، وبعد في التسعينات تتصنع منها البيتزا وتتباع في المنار بعشرات اضعاف سعرها المدعّم،

ولا شاف تدهور اداء قطاع انتاج الحبوب والزراعي بصفة عامة، ولا شاف تحول الثروات والاستثمارات من القطاعات السيادية متاع الامن الغدائي، الى القطاعات شبه الصناعية والتجارية واللي فيها فرص متاع ريع (توزيع رخص للتوريد، الواسطة،) وزادا بسبب تثبيت اسعار المنتجات الزراعية وبالتالي تدهور الاسعار "النسبية" متاع الزراعة كيف نقيسوها بالصناعة والخدمات، ولا حتى شيء.

على كل حال، هذا ما يعنيش اللي رفع الدعم بالطريقة الحالية هو الطريقة الافضل لانو خارج حاجة اسمها "اصلاح المنظومة"، وفي افضل الحالات هو تخبط في السياسات الاقتصادية.

وبكل صراحة، يوسف الشاهد واللاّ غيرو، كيف يقول كلام كيف اللي قالو ما كانش مناسب باش يعمل اصلاحات حقيقية وانو (هو واللا غيرو) جزء من اسباب تعطل الاصلاحات الضرورية.

مع الأسف.

Poster commentaire - أضف تعليقا

أي تعليق مسيء خارجا عن حدود الأخلاق ولا علاقة له بالمقال سيتم حذفه
Tout commentaire injurieux et sans rapport avec l'article sera supprimé.

Commentaires - تعليقات
Pas de commentaires - لا توجد تعليقات