تحدثت البارحة عن مقدار السخرية وتطييح القدر التي يتعرض لها جو بايدن في أمريكا سواء من الإعلام أو من مواطنين أحرار، وهو الرجل الأقوى في العالم عسكريا وإقتصاديا وسياسيا وجيوستراتيجيا والقادر فعليّا بجرّة قلم باش يفسّخ بلدان من الخريطة..
قلت أيضا أن رئيس أمريكا إلي يسخرو منه الأمريكان وما يخليو ما يعملو في تهنتيله وتطييح قدره يوميّا عندو تحتو الجيش الأقوى في العالم ووكالة الإستخبارات الأقوى في العالم وأجهزة أمنية تطير طيران ويتحكم تقريبا في كل المنظمات الدولية والمؤسسات المالية إلي تصرف على الدول الفاشلة والغنية على حد سواء،
وتساءلت علاش لا جو بايدن يتقلق أو يغضب ممن يسخرون منه ولا يحاول أن يردّ عليهم ب"كلاش" في خطابه السياسي، ولا إدارته تتجند باش تلاحق الناس إلي يمارسو في حقهم الأسمى في السخرية منه، ولا أجهزته الأمنية والقضائية تسيّب إلي عندها وتقعد تعسّ فلان آش قال وفلان آش تكلّم وشكون الصحفي إلي قال كلمة تنجم تعتبر "فعل موحش في حق رئيس الجمهورية الأمريكية".. زعمة علاش ماناش كيفهم؟
علاش كيف ما يعجبناش رأي أو موقف ونحن في السلطة وبيدينا الأجهزة والقضاء ومفاتيح السجون ما نعملوش كيما الدول القوية المتقدمة إلي عندها ثقة في روحها وإلي تعمل روحها ما شافتش وتتجاوز وتقبل أنه من حق الناس أنها تختلف معاها وتنقدها وتسخر منها وتنصرف المؤسسات متاع الدولة للعمل فيما يفيد الناس والبلاد؟؟
شنية هالعقدة المستفحلة هاذي إلي ما حبّتش تتحلّ ومنين جاتنا كل هاته الحساسيّة وإنعدام الثقة في النفس؟؟