- إلي وقت إلي ترشح قال ما عنديش برنامج، ولتوة لا يعرف له برنامج بخلاف شعارات ومشروع فردي لتعيين المقربين وتجميع السلطات .
- إلي عمل هيئة إنتخابات معينة من طرفه وحط فيها ناس موالين ليه.
- إلي أعلن نفسه رئيس للنيابة العمومية ثم عمل مذبحة في سلك القضاء وعزل قضاة رفضو باش يحطو معارضيه في الحبس دون السماح بأبسط حقوق الدفاع، وإلي يعتبر القضاة موظفين عندو وبالتالي يلزمهم يخضعو لأوامر وتعليمات السلطة التنفيذية وركب عليهم البوليسية وجعلهم صناع عندهم.
- إلي عام كامل في السلطة ما خذى حتى قرار مفيد وما حاسب حتى فاسد حقيقي ولا فتح حتى ملف متاع خوانجي وقعد يسب فيهم ويخدم بيهم وعملهم كي مسمار جحا.
- إلي أكثر شخص يعرفو من قرب هي نادية عكاشة دارت عليه وقالت فيه ما قالت…
- إلي ينقد كل المؤسسات ويجزم بفسادها كان المؤسسات متاع القمع والمتراك إلي عمرو ما قال فيها كان كل خير والتي لا فيها فساد ولا تعرف الجعايل ولا يدخلها إلا المطهرون...
- إلي فشل في كل تعيين عملو من رئيس الحكومة الأول للثاني للثالثة، لوالي بن عروس لتعيين إلي عمرو ما خدم وإلي عندو عشرين سنة بطالة على رأس ولايات ومناصب حساسة في الدولة فقط خاطرهم من جماعة التنسيقيات والحملة التفسيرية.
- إلي حط صحفيين بسبب قصيدة لأحمد مطر في الحبس وأحال مدنيين على القضاء العسكري فقط بسبب مواقف معارضة أو تدوينات.
- إلي خرج بنفسه يحكي على نفق تحت دار سفير فرانسا وعلى ظرف مسموم ومحاولات إغتيال وهمية ومهازل مشابهة بالعشرات…
- إلي عمل في إطار الحرب المزعومة على الإحتكار مداهمات لمستودعات طلعت وضعيتها قانونية تماما وأصدر تشريعات زجرية مضحكة أفسدت عمل مسالك التوزيع وخلات الناس خايفة تحط فيها مليم أحمر.
- إلي أرعب رجال الأعمال وعبر عشرات المرات على كرهه لهم وخلى الإستثمار يطيح لأدنى مستوياته والشركات هاربة فر فر للمغرب وغير المغرب.
- إلي يخرج يسب في المعارضين ويخون فيهم بمناسبة وبغير مناسبة ويحتكر الصدق والوطنية لنفسه ويرفض كل اليدين إلي تمدتلو من أحزاب ومنظمات كانت تنجم تكون في صفه لو لم يكن بارع في صنع الأعداء بدلا عن الحلفاء.
- إلي خلى البلاد في وضعية عزلة دولية غير مسبوقة والأمريكان والأوروبيين كل أسبوع يهبطو بيان يسبو فينا ودزاير مسكرة معانا الحدود ولا جاتنا فلوس من الخليج ولا من غير الخليج وقعدنا كيف التبيب إلي ما ليه حبيب.
- إلي حكومتو عايشة على أمل قرض من صندوق النقد الدولي وهو يسب فيه ويقول على وكالات التصنيف الدولية أمك صنافة.
- إلي يحتقر الإعلام ويرفض يعطي حوار واحد ويخدم في إطار التعتيم التام وصفر شفافية وحتى الناس إلي تخدم معاه ماهيش فاهمتو آش يحب يعمل.
_ إلي ما يسمع حتى حد كان صدى صوته وإلي كيف يمشي حد باش يقابلو يقعد يخطب عليه في نفس الخطاب والأربعة كلمات إلي يعاود فيهم من عام الحرب...
- إلي خطاباتو بكلها تفرقة وتقسيم للتوانسة وعدائية ولعب على الحقد الطبقي وتأجيج لمشاعر الشماتة والنقمة بين الناس...
- إلي ما عندو حتى شخصية مشهود لها بالكفاءة تخدم معاه في الفريق متاعو سواء من المقربين ليه في القصر أو في الموظفين متاع الدرجة الثالثة إلي عينهم في الحكومة.
قلت إذن إذا فهمتكم مليح، تحبو تاخذو الشخص هذا هو بيدو، إلي عمل الشي هذا الكل وغيرها من عشرات المهازل إلي نسيت شطرها، وتعملولو دستور جديد يصبح بمقتضاه شبه إمبراطور يجمع كل السلطة بين يديه ويحكم في البلاد وحدو كيما يحب ويشتهى على خاطر نحنا هكاكة باش نتفرهدو يعني وأمورنا باش تتحسن، وممكن زادة خاطرو نظيييييييف..
وطبعا بعد ما يتوفى السيد النظييييف هذا وربي يهز متاعو بعد عمر طويل ما نعرفوش شكون إلي باش يجي بعدو ويورث هالسلطة المطلقة والحكم الإمبراطوري، يعني نحنا وزهرنا كان يجينا نظيف واحد آخر صحة لينا وكان جانا مثلا مثلا كادوريم ولا الصافي سعيد ولا الهاشمي الحامدي وقتها لينا وليكم ربي سبحانو.. مشكي وعاود..
أنا نحب فقط نفهم المنطق هذا إلي خممتو بيه ومن بعد أتو نحكيو!!!!!