تقرير محكمة المحاسبات حول الانتخابات الرئاسية والتشريعية، ممتاز ومكتوب بلغة سهلة مفهومة للناس الكل، تلقاووه على موقع المحكمة، صدقوني، ما يستحقش تبسيط اصلا، ويكفي تحلّوه، وتشوفوه حتى بسرعة وتتوقفوا عند الفقرات والرسوم البيانية والجداول الي تفهمو بيه شكون الي خالف و كيفاش خالف.... و تلقاووه هوني.
اما انا شد انتباهي نكتة مضحكة مبكية في الجدول صفحة 19 من التقرير... الجدول هذا، فيه المبلغ الي كل مترشح للرئاسة، صرّح انو صرفو من مالو الخاص، على الحملة الانتخابية... وفيه ايضا، مجموع المداخيل الشخصية الي صرّح بيهم كل مترشح، للقباضة، في التصاريح الجبائية لسنوات 2017 و2018 و2019…
يعني القضاة، عملو مقارنة بين الفلوس الي السيّد قال انو صرفهم من جيبو على الحملة، ومجموع المداخيل الشخصية متاعو حسب تصاريحو للقباضة لما جاء يخلص في الضرائب في كل سنة من الثلاثة سنوات الي حكينا عليهم…
الوحيد الي جاو يشوفو فيه يلقاوه صرف من جيبو على الحملة الانتخابية، 26 مرة قد المداخيل الي قال للقباضة انو حققهم من شغلو في الثلاثة سنين، هو المترشح لرئاسة الجمهورية، السيد أحمد الصافي سعيد... قال انو صرف على الحملة من جيبو 254 الف دينار، بينما في ثلاثة سنين 2017، 2018، 2019، قال للقباضة انو يصوّر في 3267 دينار سنويا فقط (في 3 سنين مدخولو 9800 دينار فقط) ... يعني اصلا ما يصحّش عليه الضرائب تالمون قلّيل... ولا شِيء، ولا شِيء…
عاد قضاة المحكمة، باعتبار المترشح لرئاسة الجمهورية، السيد احمد الصافي سعيد، هو الوحيد الي صرف من جيبو على الحملة، 26 مرة قد مداخيلو في 3 سنين كاملين، بعثولو، قالولو فسرلنا كيفاه نجمت تصرف من جيبك 254 ألف دينار، وانت مجموع مداخيلك في 3 سنين ما يفوتش 9800 دينار؟
المترشح لرئاسة الجمهورية السيد احمد الصافي سعيد، مجبور انو يجاوب المحكمة ويفسرلها، خاطر المحكمة هي الي على ضوء تقريرها، يتقرر اعطاء او عدم اعطاء المنحة العمومية من ميزانية الشعب التونسي، لتعويض المترشحين الي جابو أكثر من 3% اصوات عن المصاريف متاع حملتهم الانتخابية، والتعويض هذا يصير على اساس المبلغ الي صرفو المترشح من جيبو فقط… وإذا ما يفسرش الحكاية، ما ياخوش تعويض من ميزانية الشعب التونسي..
دونك، المترشح لرئاسة الجمهورية، السيد احمد الصافي سعيد، جاوب المحكمة، قالهم راهو الحقيقة الحقيقة، راني عندي مداخيل ب 170 ألف دينار جايين من عملي كمسؤول ورئيس تحرير وحقوق مؤلّف، وجاب ما يثبت انو فعلا قبض هالمبلغ، وراهو الحقيقة الحقيقة عندي محل كاريه من عام 2013، يدخلّي في 36 الف دينار سنويا، و جاب عقد الكراء الي يثبت كلامو، و قالهم زادا راني زادا دخّلت 25 الف دينار من محاضرات عملتهم…
هوني حسب رأيي، فما كارثة، خاطر يا اما:
- مترشح لرئاسة عمل تصاريح جبائية غالطة باش ما يخلصش الضرائب الواجبة عليه لقباضة الشعب التونسي.
او
- تصاريحو الجبائية صحيحة، و بالحق السيد عايش بدخل ما يفوتش 272 دينار شهريا، و وقتها يكون تابع العايلات المعوزة، و تصبح التبريرات الي اعطاها للمحكمة حول مصدر مداخيلو، غالطة، و و جاه تمويل مجهول المصدر ما يحبش يفصح عليه…
اخيرا…
للي يحب يثبّت علينا، يدخل للتقرير اعلاه، الجدول صفحة 19 والفقرة صفحة 20…