أه، ديكتاتوريّة؟؟؟.....وين تشوفوا فيها الدّكتاتوريّة؟؟؟....شويّة إلغاء للدّستور....شويّة إجراءات استثنائيّة....شويّة تجميد للدّستور.....شويّة غلق للبرلمان بدبّابة....شويّة جمع للسّلط بين أيدينا....شويّة تعليمات شفويّة....شويّة تحجير سفر بدون أذون قضائيّة.....
شويّة إقامة جبريّة مخالفة لحقوق الإنسان....شويّة قضايا مُلفّفة للمعارضين....شويّة محاكمات عسكريّة للمدنيّين.....و طرف صرف مالهم معنى......إمّالا لو كان اتّخذنا إجراءات أخرى آش تسمّوهم.....قَلّو ديكتاتوريّة.....وين تشوفوا فيها الدّيكتاتوريّة؟؟؟
ثمانين مليار دولار
- واحد هرّب للخارج ثمانين مليار دولار وإلاّ أورو ما نعرفش....
-سيّدي الرّئيس، خلّيها أرضيّة باش يصدّقوها النّاس…
- علاش؟؟؟ ما تجيش؟؟؟
- لا سيّدي الرّئيس...ما تجيش... ما تقابلش بعضها بالكُل....
- كيفاش؟؟...صلّحلي كان هردتها، راني كعبة لا في الحساب…إمّالا باش مُستشار…ماو باش تصلّحلي…
- سيّدي الرّئيس، إنت كعبة لا موش في الحساب بركة......توّا ثمّة رئيس يقول "قاضي مُرتشي باني فيلا سومها 17 مليون قد سوم كرهبتي؟؟؟"....
سيّدي الرّئيس سامحني....راك عوّرت.....وأنا ما انّجمش نعاونك.....يرحم والديك، صحّحلي في استقالتي.....