قضية البلاستيك كيما كل جمعة فما مشكلة في الحفرة، نتبّع فيها كأيّها النّاس لين ريت تصريح وزير الصناعة على البلاستيك.
حسب السيد وزير الصناعة استعمال البلاستيك في شكاير السيمان بش يربًّح تونس في 20 مليون دينار عملة صعبة. عشرين مليون دينار، و مالجهة الاخرى البلاد ولّات زبلة open sky.
بحورات كانت البارح مافيها كان الحوت و الببوش ولّات فيها الكوش و الدبادز البلاستيك. تونس الخضراء ماقعدت خضرة كان بش شقوفاتها كيما قال النوالي ، تخسّرنا عشرات المرّات قد الي تربحهم في العشرين مليون دينار.
سان فرانسيسكو عملت مشروع كبير وخلقت شركة عمومية كبيرة بش تتحلّص مالبلاستيك الكل ابتداء مالعالم الجاي. كوستاريكا ولّات الوجهة العالمية للسياحة الايكولوجية الي سوّاحها يصرفوا الدوبل متاع التوريست low cost .
كوستاريكا تعوم فوق بحر متاع بترول رفضت بش تستغلّو وراهنت على الايكولوجيا وحكومتهم تنطّر في فلوس كبيرة متاع الحفاظ على البيئة.
في البحر المتوسط فمّا 600000 طن بلاستيك تمشي في البحر، الحوت ياكل الطروف الصغيرة وكلّو ناكلوه في كروشنا، وًمن هنا ل 2050 بش يولّي فمّا بلاستيك أكثر مالحوت في البحر.
النسبة العالمية هي تقريبا 2000 ميكرو طروف بلاستيك تدخل لبدن الانسان كل جمعة، وتوصل في العام ل250 غرام
تصوّروا نتيجتها على الصحّة والكنام، والسياحة، والصيد، والقرى والمدن الي على البحر. وتو العشرين مليار ،حق Bugatti ،نجموا نشريوا بيهم مفاتل. الحكاية ماهيش حكاية فلوس حكاية استراتيجة سياسية.
هذاكا علاه التقنيين التكنوقراط ما يحسبوا كان بالفلوس كي العطارة، واي سلطة بعيدة على السياسة ثنيّتها كان الحيط. و ماشينلوا بساڤينا.