من اوّل الدنيا فمّا تونس وتونس متاع الكرز غير بركة فايسبوك و غيرو من وسائل التواصل الاجتماعي ورّاو حاجات ماكانتش الناس الكل تراها. تسمعوا بالتطريدة مالبحر؟ تعرفوا كي كنا صغار نتحندروا من محطّة اميلكار برّة روح بالكفّ. تعرف الي فمّا بلايص بالوجوه( مانيش نحكي على محلّات على مدن كاملة) . تعرفوا قبل شطر حوم تونس ما يهبطوش لوسط البلاد خاطر يمرّضوهم كونترول.
تعرفوا الي مصبّ زبلة تونس كاملة في حيط متاع حومة كاملة و برّاو شوفوا الامراض الي موجودة في سيدي حسين و السيجومي. الغيتوات موجودين من قبل الاستقلال، و ماتبدل فيهم كان حاجات صغار، و بالطبيعة العنف ما يولّي كان العنف .
والي بش يجي يحكيلي لوغة الحوم ڤايضة و عنف و مخدرات، نقلّوا عدّي عام في الميزا و الّا في حي بالأعور و ايجا احكي معانا بإحترام و روح وطنية. شكون يمثلّهم الحوم هاذم؟ فنانين ؟ بيدهم يتفرّجوا في الصحاح تعكعك و هوما ينتجوا و يحاربوا. رياضيين؟ شوفوا ابطال المصارعة و العبار كيفاش يوفاو. قراية؟الي يمنع يڤطّع فيها حتّ و ينسى الميردا الي كان عايش فيها.
وين يتنفّسوا؟نحكيلكم على صالة يسكّروها خاطر من املاك التجمع خذاوها ولاد الحومة،والا طرف حديد street workout عملوه ولاد صغار تكسّرو إدارة دار شباب؟ ال3/2 متاع البلاد هكّة عايش هاك الي الازكاك يعيّطولهم فرارات. حتّى انشتاين كان كبر هوني راو ولّى فرار.
كيما سلطات الاحتلال هوما يعملوا هكّاكة بش احنا نهجّوا من امّها كيما حي الشيخ جراح بالضبط. و هذاكا الي صاير،كان حسن تن تن لا مخ لا بدن يعمل سبر آراء تو يلقى نسبة الرغبة في الهجّة 99%
بالطبيعة موش بش يهجّوا الكل. بالطبيعة الي بش يقعدوا بش يقلّعولكم الزليز من دياركم،و بالطبيعة الي عايشين البرّة يش يعاونوهم بدمّهم خاطر عيّفتوهم من اكثر حاجة يحبوها: بلادهم.
نهار آخر ماتجيوش تتلوبدوا و لا تقولوا ماكناش في الحزب الحاكم برلمان العار و الا والله كنت وزير باهي.
تونس مستعمرة و تاريخها حاربت سلطات الاحتلال، اليوم غدوة، الحرب معاكم جاية.