شاب تونسي يعيش في سويسرا... حب يشجع منتوج بلاده. شنوة باش يعمل ؟ مشى يستورد في الهريسة من تونس... الشاب عمل ماركة تجارية خاصة بيه وبدا يخدم... آنا عرضتني مرة الماركة متاعو. تصميم جميل واسم جميل وزيد ماهواش يخدم في الهريسة الصناعية. لا يخدم في الهريسة berbère…
خدم نساء وبدا الدولاب يدور... وبدات الماركة متاعو تتعرف وبدا الإقبال يزداد عليها.. لكن، "لكن" هذه هي الكارثة... وهي أصبحت عادة من عاداتنا... oui, mais... ما كل ما يتمناه المرء يدركه... تجري الرياح بما لا تشتهي السفن…
وبدات التعطيلات... مالا شنوة... ياخي باش يخليوك في راحتك هوما ؟ كيفاش يجي منّو تدخل قطاع ماهواش قطاعك ؟ يجي منّو تتطاول على بارونات الهريسة في تونس ؟
ايه ماشي في بالي فمة بارونات في الزيت وفي دقلة النور فقط... ياخي طلعوا بارونات في الهريسة... هو في الواقع كل قطاع حيوي في تونس عندو البارونات متاعو... وإياك ثم إياك تقرب منهم…
الحاصل، بدات التعطيلات في الإدارات المسؤولة على التصدير... جيب الورقة الفلانية... الحاصل شايخين عليه... كل مرة يطلبوا منو ورقة من تحت الحيط وكل مرة يطلعولو بطلعة... في الآخر كره الهريسة وكره المعاملات مع تونس... ووقف المشروع...
الشاب هذا ماهو إلا عينة بسيطة من الشباب اللي حبوا يقفزوا بمشاريعهم بأفكار ورؤى جديدة... شباب طموح... عندهم خبرة وإطلاع وعلاقات على أسواق خارجية... حبوا يعملوا من تونس اسم كبير وهوما في الواقع موش في حاجة للعمل فيها... لكن تونس خذلتهم ونكلت بهم... تقلي شكون تونس ؟ نقلك تونس البارونات وتونس الإدارة…